SQO óńirlik kommýnıkasııalar qyzmetinde bilim basqarmasy jańa oqý jylyna daıyndyq barysy jaıynda málim etti.
Basqarma basshysy Gúlmıra Kárimovanyń aıtýynsha, óńirde 75 316 oqýshy bar. Bul – ótken jylmen salystyrǵanda 2,5 myńǵa kóp. Alǵash ret 8 myń búldirshin birinshi synypqa barady. Onyń jartysynan astamy Petropavldyń úlesinde. Bıyl óńirde 472 mektep jumys istemek.
Jańa oqý jylynda 6: Aqjar aýdanynda – 1 mektep, Aqqaıyń aýdanynda – 1, Esil aýdanynda – 1, Jambyl aýdanynda – 2, Qyzyljar aýdanynda – 1 mektep jabyldy. Bul bastaýysh mektepterde nebári 4 oqýshydan ǵana oqyǵan.
«Oblystaǵy mektepterdiń 361-i – 78 %-y shaǵyn jınaqty mektepter. Jańa oqý jylynda 298 eldi mekennen 2 074 balany tasymaldaý josparlanǵan, onyń ishinde kún saıyn 1261 oqýshy, apta saıyn 813 oqýshy tasymaldanady. Bul maqsatqa 124 avtokólik bar, onyń 42-si byltyr, 18-i bıyl satyp alyndy», deıdi Gúlmıra Kárimova.
Eger oqýshy nemese muǵalim aýyrý juqtyrsa, synyp qashyqtan oqytý formatyna kóshedi.
«Qashyqtan oqytýǵa kóshken jaǵdaıda oqýshylarǵa kompıýter beriledi. Birinshi kezekte kompıýterler tabys deńgeıi tómen otbasylardan shyqqan balalarǵa úlestiriledi. Byltyr oblysqa 14 myńnan astam kompıýterlik tehnıka satyp alyndy. Búgingi tańda mektepterde 25 myńnan astam kompıýter bar. Bilim ordalary 100 % ınternetpen qamtylǵan. 62 mektep ınternetke spýtnıktik baılanys arqyly qosylǵan. Keń jolaqty Internetke 455 mektep qosyldy. Aıyrtaý aýdannyń mektepterin ınternettiń osy túrine qosý úshin jergilikti bıýdjetten 15 mln teńge bólindi. Búgingi tańda jabdyqtardy satyp alý jóninde jumystar júrgizilip jatyr», deıdi basqarma basshysy.
