Bul másele alýan túrli otbasylyq basqosý men toı ótkizýshilerden góri jergilikti ákimdikti alańdatyp otyr. Sol sebepten oblys ákimi Mahambet Dosmuhambetov kúrdelengen epıdemııalyq ahýal týraly álsin-álsin keńes ótkizip, ásirese vaksına saldyrý máselesin óz baqylaýyna aldy. Ákimniń málimetine súıensek, sońǵy kúnderi vaksına saldyrý dınamıkasy jaqsarǵanyna qaramastan, aýdandardaǵy kórsetkish áli de tómen. Atap aıtqanda, Jylyoı aýdanynda – 19,5, Maqatta – 28,2, Isataıda – 36,2, Qyzylqoǵa aýdanynda turǵyndardyń 36,5 paıyzy ǵana vaksına alǵan.
– Koronavırýs ınfeksııasyna qarsy vaksına almaǵan adamdar qaýiptiń ortasynda júredi. Olar qaýipti vırýsty ózine ǵana emes, aǵaıyn-týysyna, áriptesterine juqtyratynyn eskerýi kerek. Jaqynynan, dos-jarany men áriptesterinen aıyrylǵysy kelmegen ár turǵynnyń vaksına saldyrǵany jón. Vaksına saldyrýdy keıinge qaldyrmasaq qana ádettegi ómir yrǵaǵyna qaıta orala alamyz. Demek qaýipti indettiń betin qaıtarýdyń jalǵyz joly – vaksına saldyrý, – deıdi M.Dosmuhambetov.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, bıylǵy 1 aqpan men 22 tamyz aralyǵynda 178 462 atyraýlyq turǵyn koronavırýs ınfeksııasyna qarsy vaksınalardyń birinshi komponentin saldyrǵany belgili bolyp otyr. Al vaksınalardyń ekinshi komponentin saldyrǵandardyń sany – 128 644 adam.
– Qazir oblysta vaksına egetin 59 beket jumys isteıdi. О́ńirde vaksınalardyń jetkilikti qory bar. Máselen, 16 tamyzda óńirlik farmasevtıka qoımasyna Vero Cell vaksınasynyń alǵashqy 10 myń, keıinnen taǵy da 20 myń dozasy jetkizildi. Bul vaksınany turǵyndar 17 tamyzdan ekkize bastady. Qazir atyraýlyq turǵyndar tarapynan bul vaksınany saldyrýshylar qatary arta tústi. Bir aptada 1 700 adam Sinopharm kompanııasy shyǵarǵan qytaılyq vaksınanyń birinshi komponentin saldyrdy, – deıdi A.Baıdýálıev.
Vaksına demekshi, shalǵaı aýdandardaǵy aýyldardyń turǵyndary da ony ekkizgisi keledi. Alaıda keıbiriniń aýdan ortalyǵyna barýǵa múmkindigi joq. Sol sebepten 20 tamyzda «Deni saýdyń – jany saý» dep atalatyn áleýmettik poıyz iske qosyldy. Aldymen «Saǵyz – Atyraý» baǵytynda qatynaǵan 60 oryndyq eki vagony bar poıyzben Qyzylqoǵa, Maqat aýdandarynyń 45 turǵyny Atyraý qalasyna vaksına saldyrýǵa keldi.
– Buǵan deıin qan qysymym kóterilip, eki ret vaksına saldyra almadym. Keıin otbasymyzdyń saýlyǵy úshin vaksına ekkizdim. Balalarymyzǵa qaýipti vırýstan saqtanýdyń joly vaksına saldyrý ekenin únemi aıtyp otyramyn. Onyń ústine qazir áleýmettik jelide vaksınaǵa qarsy teris túsinik qalyptastyryp, halyqty ekiudaı pikirge qaldyryp otyrǵandar bar. Eldiń amandyǵyn, jurttyń tynyshtyǵyn oılasaq, teris aqparattarǵa shekteý qoıylýy kerek, – dep esepteıdi Qyzylqoǵa aýdanynyń qurmetti azamaty Baıǵalı Dosymbaev.
Atyraýǵa vaksına saldyrýǵa poıyzben kelgen turǵynnyń biri – Erik Jubanov (sýrette). Qyzylqoǵa aýdanyndaǵy Janterek temirjol beketinde elektrık bolyp jumys isteıdi. Jasy 60-ta.
– Kópten beri vaksına saldyrýdyń qamyn oılap júr edim. Biraq jumystan qol bosamady. Endi mine, Atyraýǵa áleýmettik poıyzben tegin kelýge bolatynyn bilip, jolǵa shyqtym. Buǵan deıin otbasymnyń músheleri reseılik Spýtnık V vaksınasyn saldyrdy. Men de osy vaksınany ektirýge sheshim qabyldap otyrmyn. О́ıtkeni qandaı qaýipti indet bolsa da adamdy vaksına ǵana qorǵaı alady. Teginde saqtanǵan adam ǵana saý júretinin esten shyǵarmaǵanymyz jón, – deıdi E.Jubanov.
Shalǵaıdaǵy aýyldardyń turǵyndaryn vaksına alý úshin oblys ortalyǵyna jetkizetin áleýmettik poıyz endi Qurmanǵazy aýdanynan qatynaıdy. Sebebi bul aýdan da Atyraý qalasynan tym alysta ornalasqan. Qazir avtomobıl jolyna kúrdeli jóndeý júrgizilip jatqandyqtan, kólikpen qatynaý múmkin bolmaı otyr.
Al karantındik shekteý talabyn buzyp, jasyryn túrde úılený, qyz uzatý toıyn, mereıtoı men as ótkizetinder azaıar emes. Myń kúndik saýlyqtan góri, bir kúndik tabysty kózdegen meıramhanalar álemdi qaýipti vırýs jaýlap turǵanda toı-dýman ótkizýshilerden tapsyrys qabyldaýdy toqtatpaı otyr. Endi osyndaı meıramhanalar polısııa qyzmetkerleriniń baqylaýyna alyndy. Oblystyq polısııa departamentiniń baspasóz qyzmeti taratqan aqparatqa qaraǵanda, meıramhanalarda otbasylyq, mereıtoılyq jıyn-toılardy ótkizýdiń aldyn alý úshin táýlik boıy polısııanyń jaıaý patrýldeý jasaqtary jumyldyrylyp otyr. Mundaı shara oblys ákimdiginiń koronavırýs indetiniń taralýyna jol bermeý maqsatyndaǵy nusqaýyna sáıkes qabyldanypty. Qazir polısııa qyzmetkerleriniń jaıaý patrýldeý jasaqtary Atyraý qalasyndaǵy iri 14 meıramhananyń janynda táýlik boıy kezekshilik atqarýǵa kiristi.
Atyraý oblysy
