Memleket basshysy Qasym-Jomart Toqaevtyń tapsyrmasy boıynsha 2021 jylǵy 1 qyrkúıekten 30 qazan aralyǵynda halyq sanaǵyn ótkizý josparlanýda.
Sanaq prosesin avtomattandyrý úshin qaǵaz tasymaldaýshylardan tolyq bas tarta otyryp, sıfrlyq tehnologııalar qoldanylatyn bolady. Sanaq eki tásilmen júrgiziledi: sanaq.gov.kz arnaıy saıtyndaǵy ınternet-saýalnama arqyly 45 kún ishinde ınternet-saýalnama júrgizý jáne elektrondy planshetterdi qoldana otyryp, ıntervıýerlerge ádettegi jappaı saýalnama júrgizý. Qosymsha Aitu Messenger otandyq mobıldi qosymshasy arqyly sanaqtan ótý múmkindigi beriletin bolady.
Respondentter Halyqqa qyzmet kórsetý ortalyqtarynda, ákimdikterde, poshta bólimshelerinde, mektepter men saýda ortalyqtarynda ornalasatyn arnaıy uıymdastyrylǵan nusqaýlyq ýchaskelerde sanaqtan óte alady. Sanaq júrgizý kezinde 32 myń adam jumysqa ornalastyrylady. Úkimet basshysy Almaty jáne Nur-Sultan qalalary, Qostanaı jáne Shyǵys Qazaqstan oblystary ákimdikteriniń halyq sanaǵyna daıyndyǵy boıynsha jumysyna oń baǵa berdi.
Sonymen qatar Mańǵystaý, Aqtóbe oblystary jáne Shymkent qalasy ákimdikteriniń tıisti jumys qarqynynyń jetkiliksizdigin atap ótti. Premer-Mınıstr qysqa merzimde mindetti vaksınalaýdan ótken jumyskerlerdiń halyq sanaǵyn ótkizý úshin qajetti sanyn jumysqa ornalastyrýdy qamtamasyz etýdi tapsyrdy.
О́ńirlerdiń ákimderine, Ulttyq statıstıka bıýrosyna jáne ishki ister, densaýlyq saqtaý mınıstrlikterine halyq sanaǵyn ótkizý boıynsha barlyq uıymdastyrýshylyq máselelerdi pysyqtaý tapsyryldy. Aqparat jáne qoǵamdyq damý mınıstrligine Ulttyq statıstıka bıýrosymen jáne ákimdiktermen birlesip, halyq arasynda ulttyq sanaqtyń júrgizilý maqsaty men tártibi týraly túsindirý jumystaryn kúsheıtý tapsyryldy.
«Bul is-sharanyń áleýmettik-ekonomıkalyq mańyzy zor. Sanaq nátıjesi boıynsha meılinshe dál derekter bolyp tabylatyn ári eldegi ahýaldy taldaýǵa, boljam jasaýǵa jáne tıisti sheshimder qabyldaýǵa negiz bolatyn kóptegen kórsetkishter alynady. Sondyqtan elimizdiń ár azamatynyń sanaqqa qatysýynyń mańyzy óte zor», dedi A.Mamın.
