Prezıdent is basqarmasynyń medısınalyq ortalyǵynyń málimetine sáıkes, senbi kúni Toqtar Áýbákirov medısınalyq ortalyq aýrýhanasyna habarlasyp, jótel, álsizdik pen tersheńdik bar ekenin aıtqan.
– Jedel medısınalyq járdem brıgadasy jiberildi. Tekseris kezinde jaǵdaı turaqty bolǵan. Satýrasııa 95%, al temperatýrasy 36.6. PTR-synama alyndy, – deıdi mamandar.
Test vırýs juqtyrǵanyn kórsetti. Áýbákirov 6 kúnnen beri aýyryp júrgenin jetkizdi. Úıde «Sýmamed» degen dári ishken. Biraq aýrýhananyń kómegine júginbegen.
– 23 tamyzda aýrýhananyń mobıldi toby úıine baryp, analız aldy. Keýde tusynyń kompıýterlik tomografııasy da jasaldy. Zerthanalyq zertteýdiń nátıjesi boıynsha Nur-Sultan qalalyq ınfeksııalyq ortalyǵyna jiberildi. Biraq pasıent aýrýhanaǵa jatýdan bas tartty, – dedi aýrýhana qyzmetkerleri.
Búgin tańerteń mamandar ǵaryshkermen taǵy sóılesip, ınfeksııalyq ortalyqqa jatýǵa kóndirdi. Dıagnozy – COVID-19. Jaǵdaıy ortasha aýyr. Ekijaqty polısegmentarlyq pnevmonııa anyqtaldy.
Toqtar Áýbákirov koronavırýsqa qarsy vaksına alǵan. Ekinshi dozasy 17 sáýirde salynǵan bolatyn.
