Kollajdy jasaǵan: Amangeldi Qııas
Mysaly, Qostanaıdaǵy «Vest» dámhanasynyń tyıym salynǵan ýaqytta jumys istep turǵany anyqtaldy. Sondaı-aq senbi kúni oblys ortalyǵyndaǵy meıramhanalardyń birinde 50 adamnyń qatysýymen ótip jatqan úılený toıy toqtatyldy. Al Naýyrzym aýdanyndaǵy «Darhan» kafesinde 60-tan astamǵa dastarqan jaıylyp, as berilgen.
«Barlyq derekter boıynsha materıal jınaldy. Qazir qujattardy oblystyq sanıtarlyq-epıdemıologııalyq baqylaý departamentine jiberdik. Atalǵan mekemelerdiń ıeleri QR ÁQ kodeksiniń 425-baby boıynsha ákimshilik jaýapkershilikke tartylady», dep málimdedi polısııa departamenti bastyǵynyń keńesshisi Elena Kasharına.
Búginde toı-tomalaqtyń naýqany meıramhanalarda ǵana emes, jalǵa beriletin jeke úılerde de qyzyp tur. Mysaly, áleýmettik jelidegi habarlamalardan qudalyq, mereıtoı sııaqty otbasylyq merekelerdi ótkizetin keń kottedjderdiń neshe túrin tabýǵa bolady. Mundaı úılerge syıyp ketetin meımandar kemi 50-den bastalyp 60-70-ke deıin barady. Bir-ekeýine qońyraý shalyp habarlasyp kórip edik, aldaǵy senbi-jeksenbide bos bolmaıtyn bolyp shyqty. Odan Ýrısk kóshesindegi №19/2 kottedjge qońyraý shaldyq. Aldaǵy demalys kúnderi bul úı de bos emes. Baǵasyn surap edik, «jumys kúnderi táýligine 50 myń, senbi jeksenbi kúnderi – 70 myń teńge. Bizdiń kottedj qalanyń ortalyǵynda, yńǵaıly jerde ornalasqan. 50 adam syıady. Qorshaý bıik, eshkim kórmeıdi. Aýlaǵa 8 mashına syıyp ketedi. Mýzykany da aıǵaılatyp qosyp qoıýǵa bolady, bólek karaoke zaly bar. Qalasańyz aýlada monsha bar, biraq ol úshin bólek esep aıyrysasyz» dep zýyldap qoıa berdi.
Jalpy, monıtorıng toby tamyz aıynyń basynan beri qaraı júrgizgen reıd sharalary barysynda karantın talaptaryn buzýdyń 121 deregi anyqtalǵan. Bul másele oblys ákimdiginde ótken jedel shtab otyrysynda da talqylandy. Shtab otyrysy barysynda Qostanaı jáne Arqalyq qalalarynyń, sonymen qatar Jitiqara jáne Qamysty aýdandarynyń ákimderi ózderi basqaryp otyrǵan óńirdegi epıdemııalyq jaǵdaı týraly esep berdi.
«Azamattardyń karantın rejimin buzý faktileri júıeli túrde tirkele bastady. Oblysta 28 sáýir men 20 tamyz aralyǵynda kópshilik oryndarǵa barǵan «qyzyl» jáne «sary» mártebesi bar 1 323-ten astam adam Ashyq qosymshasy arqyly anyqtaldy. Qurmetti oblys turǵyndary, ózderińiz ben jaqyndaryńyzdyń densaýlyǵy úshin jaýapkershilik kórsetip, COVID-19-ǵa qarsy ýaqtyly vaksınalaýdan ótýdi suraımyn», dedi oblys ákimi Arhımed Muhambetov.
Oblystyq densaýlyq saqtaý basqarmasynyń málimeti boıynsha, búginge deıin oblystyń 286 095 turǵyny vaksınanyń birinshi komponentin ekkizgen. Al ekinshi komponentti 225 385 adam qabyldaǵan.
