Azamattyq bastamalardy qoldaý ortalyǵynyń baspasóz hatshysy Sáken Qubyshevtyń aıtýynsha, bul óńirdegi toǵyz jobanyń ekeýi – shaǵyn granttar baıqaýynyń jeńimpazdary. Olar aýylda bastamalardy iske asyrýǵa jáne damytýǵa 500 myń teńge aldy. Saraptama komıssııasy 433 ótinimniń ishinen konkýrs sharttaryna saı keletin úzdik 60 jobany iriktep aldy.
Qazaly aýdany, Áıteke bı aýylyndaǵy «Shapaǵat» qoǵamdyq birlestigi osy uıymda tárbıelenip jatqan múgedek balalardy sensorlyq ıntegrasııalaýdy usyndy. Olarmen táýlik boıy úsh top jumys isteıdi – EDSh mamandary, nevropatolog, psıholog, defektolog jáne logoped. ÚEU basshysy Shynarkól Jeńsikbaevanyń aıtýynsha, konkýrsta jeńip alǵan 500 myń teńge sensorlyq jabdyqty satyp alýǵa jumsaldy:
«Biz 90 adamdy qamtýdy josparlap otyrmyz. Bul – 3 jastan 18 jasqa deıingi balalar jáne olardyń ata-analary», deıdi ol.
Jalaǵash aýdanynyń Jańatalap aýylynda turatyn bastamashyl toptyń belsendisi Janarys Túbekbaev aýyl jastarynyń qarjylyq saýattylyǵy týraly oı qozǵady. Ol granttyq qarajatty beıne sabaqtardy túsirý jáne olardy www.kbh-finance.kz saıtynda ornalastyrý jumystaryn ázirleýge jumsaımyz dep sheshkenin, sondaı-aq barlyq atqarylatyn sharalardy oılastyra otyryp, aýyldyq jerlerden kelgen 600 bala men jasóspirimdi qamtýǵa daıyn ekenin jetkizdi.
«Jobanyń barlyq qatysýshylary qorytyndy saýaldama men testileýden ótedi. Úzdik kórsetkishteri bar oqýshylar ınvestısııalyq saýattylyqty odan ári damytýǵa múmkindik alady», deıdi ol.
Sonymen qatar Janarys Týbekbaevtyń josparynda aýyldaǵy áleýmettik osal toptaryna jatatyn adamdardyń óz bos ýaqytyn utymdy paıdalanýǵa úıretý; otbasylyq ómirdiń ekonomıkalyq modelin qurýǵa daıyndaý; olardy alaıaqtar men qumar oıyndardyń áserinen qorǵaý máseleleri de bar.
Aıta keteıik, «Aýylda azamattyq bastamalardy damytýǵa baǵyttalǵan is-sharalar keshenin uıymdastyrý» respýblıkalyq jobasy Aqtóbe oblysynyń ÚEU qaýymdastyǵy Azamattyq bastamalardy qoldaý ortalyǵy men Aqparat jáne qoǵamdyq damý mınıstrliginiń qoldaýymen júzege asyrylýda.
«Egemen-aqparat»
