Eskerte ketý kerek, osydan jeti-segiz jyl buryn aımaqtaǵy iri kásiporyn – «Kazsınk» óz qarjysyna alty birdeı iri nysan, jazda da, qysta da jattyǵatyn úlken tennıs ortalyǵyn salyp bergen bolatyn.
Halyqaralyq standarttar boıynsha boı kóterip jatqan nysannyń jalpy aýmaǵy – 9 myń 600 sharshy metr. Oblys ákimi kún sýytqansha ortalyq ǵımaraty tolyq salynyp bitýi kerektigin aıtty. Munda eki sportzal bolady. Bir ýaqytta 250 sportshy jattyǵady. Jarys ótetin jerde 18 tennıs ústeli qoıylady. Múmkindigi shekteýli jandar da osy jerde jattyǵyp, densaýlyqtaryn túzeı alady.
– Buqaralyq sport Kendi Altaıda jaqsy damý ústinde. Bul kúnderi oblysta buqaralyq sportpen shuǵyldanýshylar sany 30 paıyzǵa jýyq. Dál qazir óńirdiń 15 eldi mekeninde dene shynyqtyrý-sport keshenderi salynyp jatyr. El Prezıdenti Qasym-Jomart Toqaevtyń buqaralyq sportty damytýǵa qatysty tapsyrmasy árkez basty nazarda. Jaqyn arada osy maqsatta keleli keńes ótpek. Tennıs sońǵy jyldary elimizdiń kez kelgen óńirinde damı bastady. Onyń naqty dáleli – Rybakınanyń Tokıodaǵy tabysy. Biraq onyń fınalǵa shyǵýǵa sheberligi jetkenimen, psıhologııalyq jaǵynan daıyn bolmady. Keleshekte osy ortalyqtan Olımpıada júldegerleri shyǵatyny sózsiz, – dedi óńir basshysy.
Keshendi aralap bolǵan soń, oblys ákimi jattyqtyrýshylardyń biliktiligi men sheberlik deńgeıin arttyrý qajettigine toqtalyp ótti. Qazirdiń ózinde úsh deńgeıli arnaıy baǵdarlama jasaldy. Jaqyn jáne alys shetelderdiń jetekshi mamandarymen kelisimshart jasasý da oıda bar.
Ońdasyn ELÝBAI,
«Egemen Qazaqstan» gazetiniń ardageri
О́SKEMEN
