Ranking.kz zertteýine súıensek, 2021 jyldyń ekinshi toqsanynda bilim berý salasynda 528,4 myń adam jumyspen qamtylǵan, bul bir jyl burynǵy kórsetkishten 2,5%-ǵa artyq.
Sarapshylar aımaqtyq jaǵdaıda bilim berý qyzmetkerleri Almaty oblysynda kóp (68,3 myń adam) ekenin jazady. Almaty men Shyǵys Qazaqstan oblysy da úzdik úshtikke engen. Al Atyraý oblysynyń bilim berý salasynda tek 14,2 myń adam ǵana jumyspen qamtylyp, eń az kórsetkish kórsetti.
Bilim berý qyzmetkerleriniń ortasha aılyq jalaqysy 2021 jyldyń ekinshi toqsanynda 233,9 myń teńgege jetti, bul ótken jylmen salystyrǵanda 26,8%-ǵa kóp.
О́ńir boıyna qarastyrsaq, elordadaǵy bilim berý salasynyń qyzmetkerleriniń tabysy joǵary - 350,8 myń teńge. Bul bir jyl burynǵydan 17,6% kóp. Ekinshi jáne úshinshi oryndardy Mańǵystaý oblysy (268 myń teńge) men Almaty (265,5 myń teńge) ıelendi. Eń nashar kórsetkish Batys Qazaqstan oblysynda tirkeldi. Ol jaqta pedagogterdiń ortasha jalaqysy - 200,7 myń teńge.
Sarapshylar kórsetkendeı, 17 aımaqtyń beseýinde ǵana pedagogterdiń eńbekaqysy respýblıkalyq ortasha jalaqy deńgeıinen asyp tústi. TOP-3-ten basqa, bul bestikke Qyzylorda men Almaty oblystary da kiredi.
2022 jyldyń qańtarynda balabaqsha tárbıeshileri, mektep pen kolledj ustazdarynyń jalaqysy taǵy 25%-ǵa ósedi. Sonymen qatar, 2021 jyldyń qyrkúıeginen bastap muǵalimderdi jumysqa qabyldaý men bilim berý uıymdarynyń dırektoryn taǵaıyndaý erejesi ózgeredi.
