El Táýelsizdiginiń 30 jyldyǵy jáne Álıhan Bókeıhannyń 155 jyldyǵyna oraı Qazaq ınnovasııalyq gýmanıtarlyq-zań ýnıversıteti Alash qozǵalysy jetekshisiniń atymen ataldy. Búgin bilim ordasynyń bas ǵımaratynda Álıhan Bókeıhan bıýstiniń ashylý saltanaty ótti.
Bıýst avtory – belgili músinshi, L.N.Gýmılev atyndaǵy Eýrazııa Ulttyq ýnıversıtetiniń professory Talǵat Anarbekov. Sondaı-aq ýnıversıtette «Álıhan Bókeıhan tulǵasy otandyq ǵylym konteksinde: jańa pánaralyq zertteýler men izdenister» atty ǵylymı-praktıkalyq konferensııa uıymdastyryldy.
«Semeı qalasynyń bilim júıesinde Álıhan Bókeıhan esimin jańǵyrtý isi ózekti. Bul turǵyda respýblıkalyq joǵary bilim keńistiginde ózindik orny bar – Qazaq ınnovasııalyq gýmanıtarlyq-zań ýnıversıtetiniń ataýy «Álıhan Bókeıhan ýnıversıteti» bolyp aýysty. Zamana aǵysynda ult kóshbasshysy bolǵan tulǵa esiminiń ýnıversıtetimizge berilýiniń tarıhı negizi bar. Bul bilim ordasynyń quryltaıshylary men stýdentterdiń el men Semeı qalasy tarıhyna jáne ulttyq múddeni tý etip kótergen Álıhan Bókeıhan bastaǵan Alash qozǵalysy qaıratkerleriniń tarıhı qyzmetine kórsetken qurmeti», dedi ýnıversıtet rektory Shyryn Qurmanbaeva.
