Bul týraly oblys ákimi Berdibek Saparbaev BAQ ókilderine bergen suhbatynda jan-jaqty toqtaldy.
Anyqtalǵan 106 turǵyn úıdiń 35-si kúrdeli jóndeýden ótetin bolsa, qalǵan 71-i jeńil zaqymdalǵan, olar da qalpyna keltiriledi. Barlyq jumystarǵa Úkimet tarapynan qaralatyn jáne qosymsha jergilikti bıýdjet, óńirdegi demeýshiler qarajattary jumsalady.
«Búgin bir úıdiń kúrdeli jóndeý jumystary bastalsa, qalǵan úıler boıynsha qurylysshylar erteńnen bastap iske kirisedi. Eki aıdyń ishinde barlyq úılerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti», dedi oblys ákimi.
Aıta keteıik, Memleket basshysy Qasym-Jomart Toqaevtyń sheshimimen qurylǵan Úkimettik komıssııa tóraǵasy, QR Premer-Mınıstriniń orynbasary Roman Sklıar buǵan deıin oqıǵa ornyna kelip, mán-jaımen jan-jaqty tanysqan bolatyn. Komıssııa músheleri, arnaıy mamandar kelgen shyǵyn kólemin anyqtaý jáne naqtylaý boıynsha tıisti jumystardy júzege asyrýda.
«Áleýmettik nysandarǵa qatysty toqtalsaq, 3 mektepke zaqym kelgen. Ásirese, qatty zardap shekkeni – Jibek Joly aýylyndaǵy bilim ordasy. 118 bala oqıtyn bilim mekemesiniń irgesi 1956 jyly qalanǵan. Eski mekteptiń ornyna jańa ǵımarat salýǵa sheshim qabyldandy. Aýyl halqy sanynyń ósimi eskerilip, Úkimetke 150 oryndyq jańa mekteptiń qurylysy boıynsha usynys joldaımyz. Salynatyn jer belgilendi, qujattary barynsha qysqa ýaqytta daıyndalady. Jeńil zaqymdalǵan Úshbulaq men Bazarbaı aýyldaryndaǵy mektepter demeýshiler esebinen qalypqa keltirilýde. Olar birinshi qyrkúıekke deıin daıyn bolady. Dál sondaı bir medısınalyq pýnkt te bir apta ishinde tolyǵymen jóndeledi», dedi B. Saparbaev.
Oblys ákiminiń aıtýynsha, temir jol, avtojoldar qalypty rejımde jumys jasaýda. Turǵyndardyń barlyǵy úılerine oralǵan. Úıleri kúrdeli jóndeýden ótetin Qaınar aýylynyń turǵyndary ýaqytsha baspanamen, azyq-túlikpen qamtamasyz etiledi.
Qazirgi tańda Taraz qalalyq ortalyq aýrýhanada 28 naýqas em alýda. Onyń 4-iniń jaǵdaıy ortasha aýyr. Olarǵa qajetti barlyq medısınalyq kómekter kórsetilýde. О́mirlerine eshqandaı qaýip tónip turǵan joq. Dári-dármekter men dárigerler jetkilikti.
Jalpy, medısınalyq kómekke júgingen túrli deńgeıde jaraqat alǵan 98 adamnyń ishinde qarapaıym turǵyndar joq, barlyǵy áskerıler men tótenshe jaǵdaı salasynyń qyzmetkerleri.
Qazirgi tańda habarsyz ketkender izdestirilýde. Oblys ákimi olardyń ata-analary men týǵan-týysqandarymen kezdesip, tıisti túsindirme berdi. Izdeý jumystaryna áskerıler, TJD mamandary, kınologtar, tıisti mamandar, qyzmettik ıtter, atty adamdar jumyldyrylǵan. Arnaıy dron qurylǵysynyń múmkindigi de barynsha paıdalanylýda. Qazirgi tańda 180 adam, 40 shaqty tehnıka jumys jasaýda.
