Áýeli dabyl belgisi boıynsha oblystyq Polısııa departamentiniń 300 adamnan turatyn jeke quramy men 5513 áskerı bóliminiń 520 adamdyq jeke quramy jumysqa kiristi. Sol kúni oqıǵa ornyna 30 toptan turatyn jedel járdem brıgadasynyń jáne oblystyq tótenshe jaǵdaılar departamentiniń qyzmetkerleri jiberildi. Sonymen qatar beısenbi kúni apat bolǵan jerge baratyn barlyq jol men temir jol ýaqytsha jabylyp, jaqyn mańda ornalasqan Bazarbaı, Úsh-Bulaq jáne Jańaturmys aýyldaryndaǵy turǵyndar da oqshaýlandy.
Memleket basshysy Qasym-Jomart Toqaev Jambyl oblysyndaǵy oqys oqıǵaǵa shuǵyl nazar aýdaryp, oryn alǵan tótenshe jaǵdaıdyń saldaryn joıý úshin vedomstvoaralyq memlekettik komıssııa qurýdy, qaza bolǵan azamattardyń otbasyn áleýmettik qorǵaý jáne zardap shekken turǵyndarǵa kómek kórsetý úshin barlyq qajetti sharany qabyldaýdy jáne tótenshe oqıǵa saldarynan jaraqat alǵan azamattarǵa jan-jaqty medısınalyq kómek kórsetýdi uıymdastyrýdy tapsyrǵan bolatyn.
Prezıdent tapsyrmasymen qurylǵan Baızaq aýdanyndaǵy oq-dári qoımasynda oryn alǵan órt pen jarylys saldaryn joıý jónindegi Úkimettik komıssııa Jambyl oblysyna arnaıy kelip, oqıǵa ornyna bardy. Premer-Mınıstrdiń orynbasary Roman Sklıar, Jambyl oblysynyń ákimi Berdibek Saparbaev, Qorǵanys mınıstri Nurlan Ermekbaev, Tótenshe jaǵdaılar mınıstri Iýrıı Ilın, Ishki ister mınıstriniń orynbasary Murat Baımuqashev, Indýstrııa jáne ınfraqurylymdyq damý mınıstriniń birinshi orynbasary Qaıyrbek О́skenbaev jáne basqa da ortalyq memlekettik organdardyń basshylary zardap shekken nysandarmen tanysty. О́rt saldaryn joıý jónindegi jumystardyń barysyn kórip, jaralanǵan áskerılermen jáne órt sóndirýshilermen, sondaı-aq jergilikti turǵyndarmen kezdesti.
Roman Sklıar jedel shtab otyrysyn ótkizip, jaýapty tulǵalarǵa naqty tapsyrmalar berdi. Atalǵan komıssııanyń aldynda bolǵan órt pen jarylys saldaryn joıý, zaqymdalǵan ınfraqurylymdy qalpyna keltirý, sondaı-aq zardap shekkenderge áleýmettik qoldaý, medısınalyq kómek sharalaryn kórsetý boıynsha mindetter qoıyldy. Osy oraıda, barlyq zardap shekkenderge kómek kórsetiletini, birinshi kezekte turǵyn úıler men kásipkerlik jáne ınfraqurylymdyq nysandardyń qalpyna keltiriletini aıtyldy.
Sondaı-aq Jambyl oblysynyń ákimi Berdibek Saparbaev, Qorǵanys mınıstri Nurlan Ermekbaev, Tótenshe jaǵdaılar mınıstri Iýrıı Ilın óńirlik kommýnıkasııalar qyzmetiniń alańynda ótken brıfıngke qatysyp, Baızaq aýdanynda bolǵan jarylys zardaptaryn joıý, keltirilgen shyǵyndardy anyqtaý jáne qalpyna keltirý jumystary júrgizilip jatqanyn málimdedi.
«Memleket basshysynyń tapsyrmasyna sáıkes biz jedel shtab qurdyq. Oǵan barlyq tıisti organdardyń ókilderi endi. Qorǵanys jáne Tótenshe jaǵdaı mınıstri, Ishki ister mınıstriniń orynbasarymen birge táýlik boıy oqıǵa ornynda jumys atqaryp jatyrmyz. Zardaptardy joıý, kelgen shyǵyndardy anyqtaý boıynsha sharalar atqarylýda. Jarylys bolǵan jerge jaqyn ornalasqan 3 eldi meken bar. Onyń eń jaqyny – 1 shaqyrym jerde ornalasqan Qaınar aýyly. Qalǵan ekeýi – 5 shaqyrym qashyqtyqta. Osy eldi mekenderdegi azamattardyń barlyǵy basqa jerlerge, ıaǵnı biz daıyndaǵan 10 mektep pen 5 kolledjdiń jataqhanalaryna ornalastyryldy. Qazirgi tańda 227 adam sonda qalyp otyr. Basym bóligi ózderiniń aǵaıyn-týystaryna ketti. Bolǵan jaǵdaıdy qalpyna keltirý úshin 1000-nan astam adam, 120-ǵa jýyq tehnıka tartyldy», dedi Berdibek Saparbaev. Sondaı-aq oqıǵaǵa oraı, 30-dan asa jedel járdem kóligi jumyldyrylǵan. Barlyǵy 88 adamǵa medısınalyq kómek kórsetilse, jeńil jaraqat alǵan 60 adam úılerine qaıtarylǵan. Qazirgi tańda №1 Taraz qalalyq aýrýhanasynda 28 adam em alýda.
О́ńirge kelgen Úkimettik komıssııa músheleri jaralanǵan azamattarmen de, evakýasııalanǵan turǵyndarmen de kezdesti. Komıssııa músheleri naýqastar úshin dári-dármek jóninde eshqandaı másele joq ekenin jetkizdi.
О́kinishke qaraı, elimizdiń Tótenshe jaǵdaılar mınıstrliginiń málimetinshe, atalǵan mınıstrliktiń 50-ge jýyq qyzmetkeri túrli dárejede dene jaraqatyn alǵan. Jarylystan jalpy sany 13 adam qaza taýyp, 98 adam jaraqattanǵan. Joǵalǵandardy izdestirý jumystary jalǵasýda.
Qorǵanys mınıstri Nurlan Ermekbaev pen Jambyl oblysynyń ákimi Berdibek Saparbaev Baızaq aýdanynda bolǵan jarylys saldarynan qaza tapqan áskerıler men órt sóndirýshilerdiń otbasylaryna baryp, Elbasy Nursultan Nazarbaev pen Prezıdent Qasym-Jomart Toqaevtyń atynan qaraly úılerdiń qaıǵylaryna ortaqtasyp, kóńil aıtty. Úkimettik komıssııa músheleri marqumdardyń qyzmettik mindetterin atqarý kezinde erlikpen qaza tapqanyn aıryqsha atap ótip, olardyń otbasylaryna memleket tarapynan tıisti barlyq kómek kórsetiletinin jetkizdi.
Oqıǵa oryn alǵan kúni Jambyl oblysynyń aýmaǵyna kirýge jáne shyǵýǵa tyıym salynǵan bolatyn. «Almaty – Taraz» baǵytyndaǵy joldy oblystyq jol polısııasynyń 3 ekıpajy jáne «Taraz – Almaty» jolyn 5 ekıpajy ýaqytsha jaýyp tastaǵan edi. Alǵashqy kezde №1 Taraz qalalyq aýrýhanasyna túrli jaraqatpen 32 adam túsken. Oqıǵa boıynsha óńirdiń tótenshe jaǵdaılar, quqyq qorǵaý jáne medısına salasynyń ókilderi barynsha jumyldyryldy. Belgili bolǵanyndaı, keıinnen jaraqat alǵandar men qaıtys bolǵandardyń sany artqan. Búginde Jambyl oblysynyń ákimdigi temir joldyń barlyǵy tazartylǵan soń, qaıta tekserilip, sheshim qabyldanatynyn málimdedi. Al jalpy kólikterge baılanysty qazir aınalma jol uıymdastyrylǵan. Jalpy, óńirdegi jaǵdaı turaqty. Memleket basshysy Qasym-Jomart Toqaevtyń tapsyrmasyna sáıkes tótenshe oqıǵa saldarynan zardap shekken barlyq azamatqa kómek kórsetiletin bolady.
«Zardap shekken azamattardyń arasynda múmkindigi shekteýli jáne taǵy da basqa azamattar bolsa, zańǵa sáıkes kómek kórsetiledi. Zardap shekken úıler men nysandarǵa keletin bolsaq, mamandar 3 eldi mekendi aralap shyqty. Onda órtengen úıler, basqa da nysandar tirkelmegen. Tek shatyrlar, terezeler, esikter zaqymdanǵan. Biz arnaıy komıssııa qurdyq. Qazir olar zerdeleý jumystaryn júrgizýde. Barlyq úıdi, nysandy zerdeleımiz. Zańǵa sáıkes sheshim qabyldaıtyn bolamyz», deıdi Berdibek Saparbaev.
Jambyl oblysy
