Kúni keshege deıin sondaı skeptıktiń biri – Qaraǵandy qalasynda turatyn Marat Ospanov degen jas jigit edi. Shoý bıznestiń shańyn shyǵaryp júrgen ol taıaýda ǵana ınfeksııalyq gospıtaldan shyqty. Marat ystyǵy kóterilip, jótele bastaǵanda, oǵan onsha mán bermepti. Sýyq tıgizip aldym dep oılaǵan ol óz betinshe úıde jatyp emdele bergen. Sodan, bir aptadan keıin demigip, eki ókpesi aýa jetpeı qysyla bastaǵanda ǵana amal joq jedel járdemniń kómegine júgingen. Sóıtse, onyń ókpesi 90%-ǵa qabynǵan bolyp shyqqan. Naýqas professor H.J.Maqajanov atyndaǵy kópsalaly aýrýhananyń ınfeksııalyq gospıtalinde 16 kún jansaqtaý bóliminde jatty. Odan keıin bir aptadaı palatada bolyp, em alǵan eken.
– Eger dárigerler bolmasa, aman qalarym ekitalaı edi. Muny meniń ekinshi týǵan kúnim deýge bolady, – deıdi táýbesine kelgen M.Ospanov.
Shoýmen osy ýaqytqa deıin koronavırýs ınfeksııasynyń bar ekenine kúmánmen qarap kelgenine qatty ókinedi. Endi oǵan uzaq ýaqyt ońaltý eminen ótýge týra keledi. Qazir Marat vaksına saldyrýdyń indetke toıtarys beretin birden-bir tosqaýyl ekenin aıtýdan jalyqpaıdy. Múmkindik týǵan bette ózi de ekpe alamyn deıdi. Ázirge ol tynys alý gımnastıkasyn zerttep, sonymen ókpesin jattyqtyryp júr.
– Aýyryp turǵannan keıin ómirime basqasha qaraı bastadym. Meni tanymaıtyn adamdar men úshin qan tapsyrdy, áriptesterim qarjylaı kómektesip zyr júgirdi, aǵaıyn-týys kúni-túni tileýimdi tiledi. Osyndaı kól-kósir peıil júregimdi eljiretti. О́mirimdi saqtap qalǵan aq halatty abzal jandarǵa degen alǵysym sheksiz, – deıdi ol.
Mine, jastar arasynda óte tanymal shoýmen jigit óziniń basynan ótken jaıtty basqalarǵa sabaq bolsynshy degen nıetpen oblystaǵy jýrnalıster qaýymyna egjeı-tegjeıli aıtyp berdi. Marattyń bul isin biz de naǵyz azamattyq qadam dep baǵaladyq. Qazir shoýmenniń kópke aıtar bir ǵana tilegi bar: «Jurt meniń basymnan ótken qatelikti qaıtalamasa jáne dárigerlerdiń aıtqanyn eki etkizbese eken». Sonymen birge ol eldi ekpe alýǵa shaqyrady. О́ziniń gospıtalda jatqan kezde vaksına saldyrǵan birde-bir adamnyń aýyryp túskenin kórmegenin aıtady.
Sońǵy kúnderi Qaraǵandy oblysy boıynsha koronavırýspen aýyrǵandar sany sál de bolsa tómendegen. Muny professor H.J. Maqajanov atyndaǵy kópsalaly aýrýhananyń juqpaly aýrýlar gospıtalinde jumys isteıtin dárigerler de rastap otyr. Degenmen olar bosańsýǵa áli erte ekenin aıtyp, oblys turǵyndaryn barlyq shekteý normalaryn saqtaýǵa jáne vaksına alýǵa shaqyrady.
Qazir Qaraǵandyda 200 myńǵa jýyq adam vaksına saldyrǵan eken. Al dáriger mamandardyń esebinshe, 300 myńnan astam adam vaksınalanǵanda ǵana kenshiler astanasynda ujymdyq ımmýnıtet qalyptasady eken.
Osy oraıda oblys ortalyǵynda eriktiler men memlekettik organdardyń qyzmetkerlerinen quralǵan nasıhat toptary koronavırýs ınfeksııasyna qarsy ekpe almaǵan adamdardy jeke úgitteýdi bastady. Olar úıler men páterlerge baryp, túsindirý jumystaryn júrgizedi. Zeınetkerlerge telefonmen habarlasyp, vaksınalaý pýnktine barýdy usynyp júr. Qala basshylyǵy bul is-sharanyń mindetti túrde nátıje bererine senimdi.
QARAǴANDY
