Qoǵamda «túrme túzete me?» degen suraq jıi qoıylady. Baıqaǵanymyz, OV 156/1 mekemesinde tárbıe jumystary myqtap qolǵa alynǵan. Ony búgingi ótkizilgen konsertten de baıqaýǵa bolar edi.
Shara basynda mekeme basshysy qyzmette tabandy eńbek etkenderge rızashylyǵyn bildirip, alǵys hat tabys etti. Azamattardy Konstıtýsııa kúnimen quttyqtady.
Konserttik baǵdarlamany júrgizgen Dıas Masalıov pen Serik Symbat temir torda otyrǵanymen, «tártipke baǵynǵan qul bolmas» degen Baýyrjan atalarynyń sózin tý etkendeı búginde. Sahna mádenıetin saqtaı otyryp, ortaǵa shyǵyp kezegimen ánshilerdi, ónerpazdardy ortaǵa shaqyrýmen boldy. Sóz saptaýlary da jaqsy. Ara-arasynda ózderi de ónerin ortaǵa saldy. Ásirese, jazasyn ótep otyrǵan Manat Qumanovtyń «Bizdiń eldiń jigitteri – bizdiń eldiń syrttany...» oryndaýyndaǵy áni kópshiliktiń kóńilinen shyqty. Naqyshyna keltirip oryndaǵany úshin be, álde sózderi qulaqtan kirip, boıdy aldy ma, uzaq qoshemet kórsetti.
Sonymen qatar, merekege oraı belgili ánshiler Aposh Sarbaz ben Asqar Ysqaq ánnen shashý shashty.
«Konstıtýsııa kúnine oraı osyndaı konsert uıymdastyrdyq. Bul da tárbıeniń bir kózi dep bilemin. Sottalýshylar men aıyptalýshylar joǵary jaýapkershilikpen daıyndaldy. Tipti sahnaǵa deıin ózderi bezendirdi. Bárimizge merekelik kóńil-kúı syılaǵan ónerpazdarǵa raqmet», dep mekeme bastyǵynyń orynbasary ádilet podpolkovnıgi Jasulan Moldahanov alǵysyn bildirdi.
Eskerte keteıik, merekelik is-sharada barlyq sanıtarlyq talaptar saqtaldy.
