Kýrstardy oqýshylar tańdaıdy

Al endi dástúrli «Alǵashqy qońyraý» saltanaty tek birinshi synyp oqýshylary úshin ǵana ótedi. Bul kúni baldyrǵandarǵa Ahmet Baı­­tur­synulynyń ádistemesi negizin­de ázir­lengen «Álippe» jáne «Býkvar» oqýlyq­tary tabys etiledi. Sonymen birge, 1 qyrkú­ıek­te barlyq mek­t­epterde «Táýel­sizdik jetistik­teri» ta­qy­rybynda synyp saǵattaryn ótkizý josparlanǵan.

Al eń basty jańalyq – Qaraǵandy oblysynda jańa oqý jyly dástúrli formatta bastalmaqshy. Oqýshylardyń mektep formasyn kııýi mindetti emes: klassıkalyq jáne iskerlik úlgidegi kıimge ruqsat etiledi.

Bıyldan bastap 5-8-synyp oqýshy­lary úshin «Parasattylyq jáne etıka», «Ekologııa», «Emo­sııalyq aqyl-oı jáne synı oılaý», «Medıa­saýattylyq» syndy jańa kýrstar engizilmek. Bul jerde tańdaýdy oqýshylardyń ózderi jasaıdy.

Áleýmettik osal otbasylardyń balalaryna degen qamqorlyq bıyl da jalǵasyn tabady. Bul maqsatta jalpyǵa mindetti oqý qory esebinen 22 myńnan astam oqýshy mektep formasymen jáne kerek-jaraqtarmen qamtamasyz etiledi. Sonymen qatar 16 myńnan astam oqýshyǵa tegin túski as berile­di. Bıýdjetten barlyq bas­taýysh sy­nyp oqýshylaryn tegin ystyq tamaq­pen qam­tama­syz etýge qarajat bólindi. Al «Mektepke jol» respýblıkalyq qaıyrym­dylyq aksııa­sy aıasynda áleýmettik qoldaýǵa muqtaj 3 899 balaǵa kómek kórsetilgen.

Bıyl oblystaǵy kolledjder de dástúrli formatqa oralatyn boldy. Oqý-óndiristik sheberhanalar men zerthanalar jumysyn qaıta bastaıdy. Stýdentter jataqhanaǵa ornalastyrylady.

Oblystyq bilim basqarmasynyń basshysy Gúlsim Qojahmetova barlyq bilim berý uıymdary Ashyq jobasynyń qatysýshylary bolatynyn aıtady. Atap aıtqanda, barlyq sanıtarlyq talaptar múltiksiz oryndalatyn bolady. Oqý bastalǵanda kabınettik júıe alynyp tastalady jáne túrli synyptar úshin úzilis ártúrli ýaqytqa bólinedi. Sabaq­tardy birneshe aýysymmen ótkizý de qaýip­sizdikti saqtaý sharalarynyń nátıjesinde týyndaǵan.

Jańa oqý jylynda ustazdar qaýymynyń vaksına alý máselesi de jiti nazarda bolmaq. Bilim basqarmasy bergen resmı málimetke sensek, qazirgi ýaqytta atalǵan vedomstvo qyz­metkerleriniń 90%-dan astamy koronavırýs ınfeksııasyna qarsy vaksına saldyrǵan eken.

Qaraǵandy oblysy