Is-sharaǵa jınalǵandar óńirdiń táýelsizdik jyldary jetken jetistikteri jaıynda pikir almasty.
Elimiz táýelsizdik alǵaly Mańǵystaý oblysy halqynyń sany eki ese ósken. Búginde qazynaly túbekte 720 myńnan astam adam turady.
Mańǵystaý oblysynyń ákimi S.Trumovtyń aıtýynsha, halyq sanynyń kóbeıýine baılanysty qalalar aýmaǵy keńeıip, jańa aýyldar men tutas bir aýdan paıda boldy. Munaıly – elimiz táýelsizdik alǵannan keıin Elbasy N.Nazarbaevtyń tikeleı sheshimimen Qazaqstanda qurylǵan alǵashqy aýdan. Ol kezde aýdan halqynyń sany 53 myń bolsa, osy kúni Munaıly aýdanynyń 174 myń turǵyny bar.
Táýelsizdik alǵan otyz jyl ishinde óńirdiń áleýmettik salasynda da oń ózgerister oryn aldy. Máselen, 1991 jyly óńirde 151 balabaqsha jumys istese, 2020 jylǵa qaraı olardyń sany 311-ge jetken. Sonymen qatar orta bilim beretin mektepter sany 1,5 ese ósken. Qazir aımaqta 140-tan astam mektepte oqýshylarǵa bilim men tárbıe berilip jatyr.
О́ńir basshysy S.Trumov 30 jylda densaýlyq saqtaý salasy da eleýli ózgeristerge ushyrap, joǵary medısınalyq tehnologııalarmen jabdyqtalǵan, tálimi zor, tájirıbesi mol mamandary bar emhanalar, aýrýhanalar ashylǵanyn aıtty.
– Egemendik alǵannan beri oblysymyzda 150-den astam densaýlyq saqtaý nysany iske qosylǵan. Ozyq úlgidegi Ana men bala úıi, Qan ortalyǵy, Kardıohırýrgııa ortalyǵy men Onkologııalyq dıspanser ashylyp, em alý úshin alysqa sabylatyn turǵyndarǵa oblys aýmaǵynda emdelip, kúrdeli otalardy jasaýǵa múmkindik týdy. Byltyr jedel járdem avtoparki 100%-ǵa jańaryp, talapqa saı, qajetti medısınalyq quraldarmen tolyq jabdyqtalǵan jańa kólikter satyp alyndy, – dedi ol.
Mańǵystaýdyń shekaralyq oblys retinde tranzıttik, kóliktik-logıstıkalyq jáne ınfraqurylymdyq áleýetiniń artýy da táýelsizdik alǵan soń keń kólemde júzege asyryla bastaǵan jumys. El astanasynan shalǵaıda, túbekte jatqan Mańǵystaýda temir joly, teńiz jáne avto joldar qatar damyp, búginde toǵyz joldyń torabyna aınaldy.
Táýelsizdik tarıhynda tuńǵysh ret Kavkaz, Túrkııa arqyly Eýropa elderine jańa baǵyt ashyldy. Úsh memleketti jalǵaıtyn «О́zen – Bereket – Gorgan» halyqaralyq temir jol dálizi ashyldy.
Mańǵystaý oblysy turǵyn úı qurylysy boıynsha jaqsy jetistikterge qol jetkizdi. Táýelsizdik alǵaly beri Mańǵystaýda 11 mln 333 myńnan astam sharshy metr turǵyn úı paıdalanýǵa berilgen. Oblys ákimi baspasóz qyzmetiniń habarlaýynsha, otyz jyl ishinde oblystyń jalpy óńirlik ónimi 48 ese ósti. Al jan basyna shaqqandaǵy kórsetkish 23 esege artqan. Jalpy, 2005 jyldan bastap Mańǵystaý oblysynda shaǵyn jáne orta bıznesti damytýdyń oń dınamıkasy baıqalyp, sońǵy 15 jylda shaǵyn kásipkerlik sýbektileriniń sany 3 ese ulǵaıǵan.
Prezıdent Qasym-Jomart Toqaevtyń qoldaýymen óńirdegi ınfraqurylym jańaryp, jańa joldar salyndy. Búginde munaıly ólke týrızm ortalyǵyna aınalyp keledi.
Jıyn barysynda sóz alǵan oblystyq qoǵamdyq keńestiń múshesi Jánibek Qojyq táýelsizdik alǵannan keıin elimizde Ata Zańymyz qabyldanyp, shekaramyz belgilengenmen qatar táýelsiz sana qalyptasa bastaǵanyn aıtady. Ol jasampazdyq jolynda Mańǵystaýdyń da jetken jetistikteri az emestigin tilge tıek etti. «Táýelsizdik alǵanǵa deıin Mańǵystaýdyń bir de bir aýylynda gaz bolǵan joq. Sońǵy 20 jylda Mańǵystaý 100 paıyz qamtyldy. Bul respýblıka boıynsha birinshi kórsetkish», dedi J.Qojyq.
Bıylǵy mereıli jyl aıasynda oblysta «El ıgiligi úshin!» jobasy bastaldy. Joba óńir turǵyndary úshin asa qajetti áleýmettik mańyzy bar nysandar men sharalardy júıeli iske asyrý úshin jasaqtalǵan. Jyl basynan beri oblys turǵyndaryna ártúrli tartýlar jasalyp jatyr. Aýyldarda sport keshenderi, jańa saıabaqtar ashylyp, sýburqaqtar iske qosyldy. Aqtaýda Tuńǵysh Prezıdent saıabaǵynyń qurylysy bastaldy.
Jyl sońyna deıin taǵy birqatar óndiristik jáne áleýmettik-mádenı nysandardy halyq ıgiligine tapsyrý kózdelýde. «Aýyl – El besigi» jobasy aıasynda jalpy 3 mlrd teńgege 102 shaqyrym jol salynyp, ortasha jóndeý jumystary júrgiziledi. Jańa oqý jylynda eńseli mektepter men balabaqshalar paıdalanýǵa beriledi dep kútilýde.
