«Ult taǵdyry synǵa túsken sátte kózi ashyq azamattar árdaıym kósh bastaǵan. Adasqanǵa jón siltep, jastarǵa baǵyt-baǵdar bergen. El aǵalary bir aýyz sózben tentegin tyıyp, tektisin tórge ozdyrǵan. Biz qanymyzǵa sińgen osy qasıetten aırylmaýymyz kerek», dedi Prezıdent.
Memleket basshysynyń aıtýynsha, qazir – ǵalamtor dáýiri. Ondaǵy beı-bereket aqparat tasqyny urpaqtyń sanasyn ýlap, bir sáttik tanymaldyqty kókseıtin tamyrsyz ıdeıalar jappaı beleń alyp jatyr.
«Bul – asa qaterli úrdis. Dál osy kezeńde ult zııalylarynyń ustanymy jáne belsendiligi aıryqsha mańyzdy. Zııalylardyń eńbegi marapatymen emes, salıqaly sózimen jáne naqty isimen baǵalanady. Basty mindet – jalpy adamzatqa ortaq qasterli qundylyqtardy jastardyń boıyna sińirý. Otanshyldyq, bilimge qushtarlyq pen eńbekqorlyq, birlik pen jaýapkershilik sııaqty qasıetter dáriptelýi kerek. Sondyqtan, zııaly qaýymdy el bolashaǵyna áser etetin árbir máseleden shet qalmaýǵa shaqyramyn», dedi Q.Toqaev Joldaýynda.
