Prezıdenttiń memleketimizdiń qorǵanys qabiletin nyǵaıtý qajettigi týraly aıtqan sózderi de óte mańyzdy. Qaýip-qaterlerge den qoıýdyń jedeldigin arttyrý memlekettik mańyzy bar basymdyq bolyp qalýy qajet.
Aýǵanstandaǵy qazirgi jaǵdaıdy búkil álem kórip, bilip otyr. Aýǵanstan – geografııalyq turǵydan bizge jaqyn el. Sondyqtan da bizdegi basty mindet – qyraǵylyqty joǵaltpaý jáne qaýipsizdigimizdi nyǵaıtý bolyp sanalady. Mańyzdy qujatta osy máselege arnaıy nazar aýdarǵan Memleket basshysy elimizdiń syrtqy qaýip-qaterler men oqıǵalarǵa, jaǵdaıdyń ýshyǵýyna tas-túıin daıyn bolý kerektigine erekshe mán berip otyr.
Bul elde bolyp jatqan oqıǵalar Qazaqstanǵa tikeleı qaýip tóndirmeıdi. Biraq belgili bir qater týǵyzary sózsiz. Biz Aýǵanstandaǵy jaǵdaıǵa qatysty halyqtyń alańdaýshylyǵyn kórip otyrmyz. Qoǵamda mazasyzdyq óse túspese, áli de seıile qoıǵan joq. Al eger halyqaralyq jaǵdaı ýshyǵyp ketse, bizdiń kúshtik qurylymdarymyz kez kelgen jaǵdaıǵa barynsha daıyn bolýy kerek. Álemdi alańdatqan bul jaıt kúshtik qurylymdarymyzdyń barlyq bólimshelerine belgili bir mindetter júkteıdi.
Jahandyq shıelenistiń ýshyǵyp bara jatqanyn eskere otyryp, Memleket basshysy qorǵanys ónerkásibi kesheni men áskerı doktrınany qaıta júkteý mindetin qoıyp otyr. Sondaı-aq áskerı qyzmetshilerdiń azamattyq mamandyqtardy ıgerýi de nazardan tys qalmaıdy.
Qorǵanys mınıstrliginiń aldyna birqatar mindetter qoıǵan Prezıdent Qarýly Kúshterdi damytýdyń 2030 jylǵa deıingi tujyrymdamasynyń barlyq basymdyqtaryn tolyq kólemde iske asyrýdy tapsyrdy. Sonymen qatar Memleket basshysy áskerı qaýipsizdik qaterlerine jedel den qoıý úshin basqarý organdaryn daıarlaý jónindegi is-sharalardy jalǵastyrý máselesine de basa nazar aýdardy.
Joǵarǵy Bas Qolbasshy barlyq oq-dáriler qoımalarynda qaýipsizdikti qamtamasyz etý úshin qatań sharalar qabyldaýdy jáne eldi mekenderden alys jerde zamanaýı saqtaý nysandarynyń qurylysyn tezdetýdi talap etti. Tıisti qarajat «Qaýipsiz el» ulttyq jobasy sheńberinde qarastyrylýǵa tıis.
Senatorlar Joldaýda aıtylǵan basymdyqtar men naqty mindetterdi iske asyrý úshin belsendi jumys isteıtin bolady.
Nurjan NURSIPATOV,
Parlament Senatynyń depýtaty, Halyqaralyq qatynastar, qorǵanys jáne qaýipsizdik komıtetiniń hatshysy
