Sochı Olımpıadasynyń bastalýyna da sanaýly kúnder qaldy. Qysqy sporty damyǵan memleketterdiń órenderi aq qar, kók muzda júlde jınaıtyn dodaǵa qazaqstandyq sportshylar da qyzý daıyndyq júrgizýde. Olardyń arasynda ońtústikqazaqstandyqtar da bar. Buryn mundaı básekelerdi tek teledıdardan tamashalaıtyn jyly óńirdiń saıypqyrandary Olımpıada júldesine talasýǵa nıetti.
Sochı Olımpıadasynyń bastalýyna da sanaýly kúnder qaldy. Qysqy sporty damyǵan memleketterdiń órenderi aq qar, kók muzda júlde jınaıtyn dodaǵa qazaqstandyq sportshylar da qyzý daıyndyq júrgizýde. Olardyń arasynda ońtústikqazaqstandyqtar da bar. Buryn mundaı básekelerdi tek teledıdardan tamashalaıtyn jyly óńirdiń saıypqyrandary Olımpıada júldesine talasýǵa nıetti.
Shymkentte dál qazir qar aralas jańbyr tópep tur. Keshe tańǵa deıin tolassyz jańbyr jaýǵan. Dál osy sátte Shymkent qalalyq №8 qysqy sport túrleri mektebiniń dırektory Baqytjan Zııabekov Ońtústik jurtynan súıinshi surady.
Frıstaıl sportynan Jibek Arapbaeva men Janbota Aldabergenova Sochı dodasyna joldama aldy. Shymkent qalasynyń №8 qysqy sport túrlerinen mamandandyrylǵan balalar men jasóspirimder sport mektebi ujymynyń ortaq jeńisi.
Jalpy, frıstaıl sportynan ońtústikqazaqstandyqtar elimizde ǵana emes, halyqaralyq dodalarda da top jaryp júr. 2011 jyly Astana jáne Almaty qalalarynda ótken Qysqy Azııa oıyndarynda Jibek Arapbaeva men Rýslan Ablıatıfov júldeger atandy. Qazaqstan birinshilikterinde eshkimge des bermeıtin jerlesterimiz Eýropa kýboktarynda elimizdiń abyroıyn aspandatty. Olardyń qataryna Janbota Aldabergenova qosyldy. Bul boıjetken bıyl naýryz aıynda ótken Eýropa kýbogynyń alǵashqy eki kezeńderinde birinshi oryndy jeńip aldy.
– Álemdik reıtıngte Janbota Aldabergenova – 17, al, Jibek Arapbaeva 18-shi orynda tur, – deıdi Baqytjan Zııabekov. – Al Olımpıada oıyndaryna alǵashqy 25 sportshy qatysady. Demek, jerlesterimizdiń múmkindigi joǵary. Qazir irikteý saıystary ótip jatyr. Sol synda kerekti upaılaryn jınasa, Janbota men Jibek Sochı Olımpıadasyna joldama alady. Oǵan senimdimiz.
Sonymen qatar, Baǵlan Ińkárbek pen Aqmarjan Qalmurzaevanyń da aıaq alystary jaman emes. Ulttyq qurama sapynda qarakóz qandastarymyzdyń óte az ekenin eskersek, Ońtústiktiń namysty qyz-jigitteriniń tabysyna búkil Alash jurtshylyǵy tileýles bolatyny sózsiz. Qazir Shymkentte frıstaılmen 104 sportshy aınalysýda.
Úsh jyl buryn ashylǵan bul mektepte frıstaıldan bólek, qysqy sporttyń 4 túrinen úıirme jumys isteıdi. Jetistikteri de az emes. Short-trek bóliminde 5 jattyqtyrýshy bar. Búginde 222 bala sporttyń osy túrimen aınalysyp, jetistikterge jetýde. Máselen, byltyr el birinshiliginde N.Beıseev chempıon atansa, A.Dáýletálıeva, M.Sabanbaı, J.Turatbekov jáne T.Sultanbekov kúmis medalǵa ıe boldy. Al A.Aıtbaı qola júldeger atandy. Qazaqstannyń bıylǵy chempıonatynda jerlesterimiz toptyq básekede 9 júldege ıelik etse, oqýshylar arasyndaǵy III qysqy spartakıadada uldar da, qyzdar da qola júldeni jeńip aldy.
Eń ádemi ári tartymdy sport túrleriniń biri – mánerlep syrǵanaýmen shuǵyldanatyndar sany da artý ústinde. Shymkenttegi «Muz saraıynda» 156 sportshy osy sport túrin serik etip, jaýapty syndarǵa daıyndalýda. Olarǵa 7 bapker tálim beredi. Mánerlep syrǵanaýdan Dýbaı qalasynda ótken halyqaralyq jarysta shymkenttik B.Jambyl men A.Japbarov jeńimpaz atansa, D.Nuralıeva úzdik úshtikke endi. Bıyl uıymdastyrylǵan III qysqy spartakıadada D. Tursymbaeva birinshi oryndy jeńip aldy. Almatyda ótken «Qııal» klýbynyń ashyq birinshiliginde D.Tursymbaeva, O.Melnıkov, D.Sırotına, B.Jambyl, D.Ksendzıýk, D. Ilııas jáne A.Quralova top jardy. Sondaı-aq, «Dınamo» qoǵamdyq birlestiginiń ashyq birinshilikterinde de jerlesterimiz júldeli oryndardy ıemdendi. Almatydan bilikti bapker aldyrǵan shymkenttikter keleshekte osy sport túrinen Azııa, álem birinshilikterinde júlde alýdy kózdeıdi.
Sońǵy jyldary álemniń birneshe memleketinde ámbebap jekpe-jek (ýnıboı) joǵary qarqynda damýda. Bul saıysta sportshylar 300 metrge shańǵymen júgirip, pnevmatıkalyq myltyqpen nysana kózdeıdi. Al úshinshi synda qarsylaspen qar ústinde eki mınýt kúresedi. Osy úsh synnan kóp upaı jınaǵandar ǵana jeńis tuǵyryna kóteriledi. О́te qıyn sportty meńgergender Ońtústikte barshylyq. Búginde qalamyzda 100-ge jýyq jas osy sportpen shuǵyldanady. Olarǵa 3 jattyqtyrýshy jetekshilik etedi. Oljasyz da emes. Reseıdegi álem birinshiliginde N.Nartbaı 3-oryndy jeńip alsa, 80 kılo salmaq dárejesinde I.Azız chempıon atandy. Odan ózge halyqaralyq dodalarda da jerlesterimiz el namysyn abyroımen qorǵap júr. Olımpıada oıyndary baǵdarlamasyna enbedi demeseńiz, bul sport óte qyzyqty. Keleshegi bar.
Shaıbaly hokkeı dese ishken asyn jerge qoıatyn jankúıerler kóp. Tartymdylyǵy jóninen fýtboldan keıingi oryndardyń birinde turǵan hokkeı sportymen Shymkentte 244 oqýshy jattyǵady. On tórt topqa bólingen jasóspirimderdi 4 jattyqtyrýshy baptaıdy. Ázirshe, bul sport túrinen aýyz toltyryp aıtarlyq jetistik joq. Degenmen, Ońtústik hokkeıiniń bolashaǵy alda. Jýyrda Shymkentte eresekter arasynda halyqaralyq saıys ótti. Endi jastar, jasóspirimder arasyndaǵy básekeler de uıymdastyrylmaq. Mine, osy jarystarda jas hokkeıshilerimiz sheberlikterin shyńdasa, keleshekte álemge tanymal juldyzǵa aınalýy ǵajap emes. Buryn tek О́skemen men Almatyda ǵana keń qanat jaıǵan bul sport búginde Atyraý, Pavlodar, Aqmola, Soltústik Qazaqstan, Qaraǵandy oblystarynda da joǵary qurmetke ıe. Ol óńirlerdiń qataryna Ońtústik Qazaqstan oblysy da qosyldy.
Qysqy sportty myqtap qolǵa alǵan Shymkentte maqtaýǵa turarlyq jeńister jeterlik. Ony №8 qysqy sport túrleri mektebiniń úsh jylda qol jetkizgen tabystaryn saraptaı otyryp ańǵardyq. Ázirshe, Ońtústikte qysqy sporty túrlerinen Olımpıada júldesi joq. Bálkim, Sochı Olımpıadasynda tarıhı jeńiske kýá bolatyn shyǵarmyz. Sondyqtan frıstaıl sheberlerine sáttilik serik bolsyn dep tileıik.
Oralhan DÁÝIT,
«Egemen Qazaqstan»,
Ǵabıt SAPARBEKOV,
jýrnalıst.
Ońtústik Qazaqstan oblysy.
