Úkimet otyrysynda Bilim jáne ǵylym mınıstri Ashat Aımaǵambetov birjolǵy aqshalaı syıaqy halyqaralyq olımpıadalardyń jeńimpazdaryn daıyndaǵan pedagog-tálimgerlerge de beriletinin jetkizdi.
«Zııatkerlik, shyǵarmashylyq, sporttyq baǵyttar boıynsha jáne WorldSkills syndy halyqaralyq olımpıadalardyń jeńimpazdaryn qoldaý maqsatynda konkýrsqa qatyspaı-aq joǵary oqý oryndaryna túsý úshin grant taǵaıyndaý máselesi zańnamalyq túrde retteletin bolady. Sondaı-aq halyqaralyq zııatkerlik olımpıadalarǵa qatysýshylardy yntalandyrý jáne qoldaý úshin altyn medal ıegerlerine – 1500 AEK, kúmis – 1000 AEK, qola – 500 AEK kóleminde syıaqy taǵaıyndaý josparlanyp otyr», dedi Ashat Aımaǵambetov.
Osy sharalardy júzege asyrý úshin «Bilim týraly» Qazaqstan Respýblıkasynyń zańyna tolyqtyrýlar engiziletin bolady. Atap aıtqanda, jalpy bilim beretin pánder boıynsha halyqaralyq olımpıadalardyń jeńimpazdary men júldegerlerin, olardyń jattyqtyrýshylaryn kótermeleý qaǵıdalaryn bekitý Bilim jáne ǵylym mınıstrliginiń quzyretine kirmek.
Aıta ketelik, bıyl iri halyqaralyq jarystarda oqýshylar 26 medal jeńip alyp, rekordty jańartty. Iаǵnı bilim alýshylar el qorjynyna 2 altyn, 13 kúmis jáne 11 qola medal saldy. Eske sala keteıik, buǵan deıin Memleket basshysy Qazaqstan halqyna Joldaýynda daryndy balalardy jan-jaqty qoldaýdy tapsyrǵan bolatyn.
