«Bas qalada bıyl áleýmettik mańyzy bar azyq-túlik ónimderiniń baǵasyn turaqtandyrý maqsatynda 14 jármeńke ótkizý josparlanǵan. Sonymen qatar kókónis, jemis-jıdekterdiń pisetin ýaqytyn eskerdik. Úshinshi ret uıymdastyrylǵan dástúrli jármeńkege Shyǵys Qazaqstan oblysynyń 15 aýdany men 2 qalasynan quny 500 mıllon teńgege jýyq aýylsharýashylyq ónimderi ákelindi. Turǵyndar belsendilik tanytyp, jármeńkege tańǵy 7-den jınalypty, negizi 8:00-de bastalýy kerek edi. Qazir saýda qyzyp tur. Barlyq taýar esh qıyndyqsyz ári sanıtarlyq talaptarǵa saı jetkizildi. Jármeńkege kelýshilerdiń sanıtarlyq-epıdemııalyq talaptardy saqtaýy baqylanady. Sondaı-aq ashyq bazarda saýdagerler men tutynýshylardyń maska taǵyp, áleýmettik qashyqtyqty saqtaýy da qadaǵalanady», – dedi Investısııalar jáne kásipkerlikti damytý basqarmasy basshysy Erjan Baltaev.
Shyǵystan jetkizilgen azyq-túliktiń qatarynda et jáne sút ónimderi, bal, balyq, jemis-jıdek pen kókónister, shujyq ónimderi, kúnbaǵys maıy, ún-jarma, túrli daqyldar bar. Baǵasyna toqtalsaq, jylqy etiniń 1 kelisi – 2000-2400 teńge, taýyq etiniń 1 kelisi 900-1000 teńge aralyǵynda. Balyq baǵasy 1000-1800 teńge, kartop, qyryqqabat, pııaz kelisi 120 teńgeden, al sábizdiń kelisi 130 teńge. Jalpy, elordaǵa 30-ǵa jýyq ónim túri jetkizilgen.
«Nur-Sultan qalasynynyń tórinde jaımashýaq aýa raıynda ótip jatqan jármeńke halyqtyń kóńilinen shyǵyp jatyr. Jármeńkege 45 tonna jylqy etin ákeldik. Bizde ókinishke qaraı, vaksınasııa aımaǵy degen bar. Shyǵys Qazaqstan soǵan kiretindikten sıyr, qoı etin sata almaımyz. Malǵa vaksına saldyrǵannan keıin ony ákelýge ruqsat joq. Elordalyqtar jylqy etin jaqsy satyp alyp jatyr. Sonymen qatar 40 tonna bal, 100 tonna kartop ákelip otyrmyz. Bizdiń basty maqsatymyz – aqsha taýyp qalý emes, óz ónimderimizdi, aýdan brendterin astanalyqtarǵa usyný», – dedi Shyǵys Qazaqstan oblysy ákiminiń orynbasary Erjan Nurbaev.
Jármeńkege óz taýarlaryn satýǵa kelgender jáne ony arzan baǵamen satyp alǵandar da rıza. Malına jáshigin kótergen aǵamyzdy sózge tartyp edik, tosap qaınatý úshin alyp jatqanyn aıtyp, baǵasynyń da aıtarlyqtaı arzan ekenin jetkizdi.
«Osy jármeńkeni arnaıy kúttik. Munda barlyq qajetti ónimder usynylǵan. Búgingi jármeńke kóńilimizden shyǵyp otyr. Mundaǵy keıbir taýar baǵasy qara bazardan áldeqaıda arzan eken. Qysqa azyq daıyndaý kerek qoı, banki jabý úshin jemis-jıdek, kókónisterdi jármeńkeden almasań, dúkenderdegi baǵa basqa. Et, sút ónimderin aldym. Elordada jyl saıyn osyndaı jármeńkeler ótkiziletinine, bul jumystar bolashaqta da jalǵasa beretinine qýanyshtymyn», – dedi qala turǵyny Serik Kúmisbekov.
Aıta keteıik, Nur-Sultanda aýyl sharýashylyǵy óńirlik jármeńkeleriniń maýsymy 31 qazanǵa deıin jalǵasady.
