Tarıhqa kóz júgirter bolsaq, eki eldiń quramalary buǵan deıin jasyl alańda úsh ret kezdesken eken. Onyń ekeýinde Fınlıandııa quramasy jeńiske jetken bolsa, bireýinde jerlesterimiz basym túsken. Qazaqstan men Fınlıandııa quramalarynyń eń alǵashqy tanystyǵy 2006 jyly bastalǵan bolatyn. Sol jyldyń aqpan aıynda ótken joldastyq kezdesýde Qazaqstan fýtbolshylary qarsylastarymen negizgi ýaqytta teń túsip, match sońyndaǵy penaltı serııasynda jeńiske jetken edi. Keıingi eki kezdesý 2008 jylǵy Eýropa chempıonatynyń irikteý kezeńi aıasynda ótip, toptyq básekedegi eki oıynda da fınlıandııalyqtar basym tústi. 2006 jyldyń qazanynda Almatyda ótken birinshi oıynda qonaqtar 2:0 esebimen jeńiske jetken bolsa, 2007 jyldyń tamyzynda Tamperede uıymdastyrylǵan qarymta kezdesýde de alań ıeleri 2:1 nátıjesimen jerlesterimizden aılasyn asyryp ketti. Endi, mine, araǵa 15 jyl salyp álem chempıonatynyń irikteý kezeńi aıasynda eki eldiń fýtbolshylary jasyl alańda qaıta jolyqty. О́kinishke qaraı, Helsınkıdegi Olımpıadalyq stadıonda ótken bul oıynda da skandınavııalyqtar 1:0 esebimen jeńiske jetti.
Qazaqstan ulttyq quramasynyń bas bapkeri Talǵat Baısýfınov Ýkraınamen bolǵan matchtan (1:1) keıingi baspasóz máslıhatynda Fınlıandııamen ótetin oıynda qurama fýtbolshylary 80 paıyzǵa jańarady dep málimdegen edi. Alaıda matchtan bir saǵat buryn birinshi mınýttan bastap alańǵa shyǵatyn negizgi quram fýtbolshylarynyń tizimi 100 paıyzǵa jýyq jańarǵanyn baıqadyq. Ýkraınaǵa qarsy shyqqan oıynshylardan tek Aleksandr Marochkın ǵana óz ornyn saqtap qalypty. Elordada ótken oıynnyń qaharmanyna aınalǵan Rýslan Valıýllın alańǵa shyǵýy múmkin oıynshylardyń tizimine de ilinbeı qalsa, qaqpashy Stas Pokatılov sary qaǵazynyń kóptigine baılanysty, al shabýylda oınaǵan Azat Nurǵalıev pen Baqtıer Zaınýtdınov vıza máselesi boıynsha Fınlıandııaǵa bara almady.
Osylaısha, bas bapker Helsınkıde alańǵa ekinshi quram fýtbolshylaryn shyǵarýǵa májbúr boldy. Sondaı-aq osy matchta úsh birdeı oıynshymyz ulttyq qurama sapyndaǵy debıýt oıynyn ótkizdi. Atap aıtar bolsaq, «Kaspıı» klýbynyń jartylaı qorǵaýshysy Maqsat Táıkenov, «Shahter» klýbynyń shabýylshysy Aıdos Táttibaev jáne «Tobyldyń» jartylaı qorǵaýshysy Samat Jarymbetov ulttyq qurama jeıdesin kıdi.
Fınlıandııa – Qazaqstan matchyna toqtalar bolsaq, birinshi taımda eki eldiń oıynshylarynda gol soǵatyn múmkindikter bolǵanymen, esep ashylmady. Alǵashqy 45 mınýtta bizdiń quramadan Abat Aıymbetovtiń gol salatyn tamasha múmkindigi bolǵan-dy. Biraq ony shabýylshymyz óz paıdasyna jarata almady.
Al ekinshi taım bastala salysymen Iаn Vorogovskıı aıyp alańynyń syrtynan keremet soqqy jasap edi. Biraq qaqpashy Lýkash Gradeskı óz ornynan tabylyp, qaýipti soqqynyń betin qaıtardy. 60-mınýtta Iere Ýronenniń qaptaldan asyrǵan pasyn Ioel Pohıanpalo baspen qaqpaǵa dál baǵyttady. О́kinishke qaraı, I.Shaskıı bul dopty qaıtarýǵa tyrysqanymen, dopqa jete almady. Match sońyna deıin eki qurama oıynshylary atap aıtarlyqtaı qaýipti shabýyl uıymdastyrǵan joq. Qorytyndy esep – 1:0.
Alań ıeleri bul jeńisinen keıin 5 upaımen D tobynda ekinshi orynǵa kóterildi. Al Talǵat Baısýfınov shákirtteri 2 upaımen sońǵy orynda tur.
Sonymen qatar keshe bizdiń toptyń kóshbasshysy sanalatyn Fransııa quramasy Ýkraınaǵa qonaqqa baryp, qatarynan ekinshi oıyn teń tústi. О́tken týrda Bosnııa jáne Gersegovına fýtbolshylarymen (1:1) oınaǵan «Úsh jolaqty» eldiń oıynshylary Ýkraınadan dál osyndaı eseppen eline oraldy. Kezekti bir upaıyna qol jetkizgen Fransııa 5-týrdan keıin 9 upaımen birinshi orynda tursa, toptyq kezeńdegi bes matchtyń beseýinde de teń oınaǵan ýkraınalyqtar 5 upaımen úshinshi satyda tur. Al úsh oıyn ótkizgen bosnııalyqtar 2 upaımen tórtinshi orynda keledi.
Endi jerlesterimiz kelesi oıynyn erteń dál osy Bosnııa jáne Gersegovına quramasymen ótkizedi. Bul – eki quramanyń óz tarıhyndaǵy birinshi kezdesýi bolmaq. Match elorda ýaqytymen 00:45-te bastalady.
