Joldaýda kókeıdegi kóptegen túıtkildi máselelerdiń túıini tarqady. Ásirese, Qyzylordadan Mańǵystaýǵa deıin jut dendep, mal jaıylymy qıyndaǵan tusta aýyl-aımaqtaǵy jurtqa úlken jiger, úmit syılady. Bul – ulttyń qaı ýaqytta da uıysa bilýiniń dáleli.
El Prezıdenti óz Joldaýynda memlekettik tildiń mártebesine toqtalyp, qazaq tili, shyn máninde, bilim men ǵylymnyń, mádenıet pen is júrgizýdiń tiline aınalyp jatqanyn aıtty. «Jalpy, memlekettik tildi qoldaný aıasy keńeıip keledi. Bul – zańdy qubylys, ómirdiń basty úrdisi. Sondyqtan, qazaq tiliniń órisi tym shektelip bara jatyr deýge negiz joq. Ata Zań boıynsha Qazaqstanda bir ǵana memlekettik til bar. Bul – qazaq tili. Orys tili resmı til mártebesine ıe. Bizdiń zańnamaǵa sáıkes, onyń qoldanylýyn shekteýge bolmaıdy. Bolashaǵyn Otanymyzben baılanystyratyn árbir azamat qazaq tilin úırenýge den qoıýǵa tıis. Bul otanshyldyqtyń basty belgisi deýge bolady», dedi Prezıdent.
Taǵy bir eleýli jańalyq, mádenıet qyzmetkerleri men muraǵatshylar, kitaphanashylardyń eńbekaqysyn júıeli túrde kóbeıtýdi tapsyrdy. Bul bastama óńirlerdegi mádenıet salasynyń mamandary úshin úlken jańalyq boldy dep oılaımyn. Ár Joldaýdyń ózindik taqyryby men maǵynasy bar desek, kúni keshe jarııalanǵan Joldaý, negizinen halyqtyń áleýmettik ahýalyn kóterýge arnalyp otyr.
Sondaı-aq Memleket basshysy ulttyq ıdeologııanyń ishinde ózimizdiń ulttyq saıasatymyzdy ustaný kerektigin aıtty. Odan bólek memlekettik bıýdjet esebinen mádenıet pen rýhanııat salasyna bólinetin qarjynyń belgili bir mádenıet qaıratkerleriniń jobalaryna jumsalyp otyrǵanyna da toqtaldy. «Jas ári daryndy músinshiler, sýretshiler, teatr qyzmetkerleri, mýzykanttar, qalamgerler jańa janr túrlerin ıgerip, udaıy izdenis ústinde júredi. Sóıte tura, olar eleýsiz qalyp, mesenattardyń kómegimen ǵana kún kóredi. Shyn máninde, Qazaqstan mádenıeti sol jas daryndardyń arqasynda jahandyq deńgeıde tanylyp júrgen joq pa?!» dep, jyl sońyna deıin jańa mádenıetti jáne onyń daryndy ókilderin dáripteýge baǵyttalǵan naqty jobalar josparyn usynýdy tapsyrdy.
Jańa Joldaý – keshegi Jambyl óńirindegi jarylystan soń ári jaz boıy aýyl-aımaqtaǵy qýańshylyqtan keıingi elge úlken moraldyq kómek dep bilemin. Qoǵamǵa da tyń serpin alyp keldi. Memlekettiń ár salasyna ózgeris engizgen bul Joldaý Qasym-Jomart Kemelulynyń el tizginin ustaýǵa laıyq tulǵa ekenin kórsetti.
Talǵat TEMENOV,
rejısser, Qazaqstannyń halyq ártisi
