Sonymen qatar energııanyń jańa kózderi, eńbek qatynastary, kóshi-qon men demokratııalandyrý, quqyq qorǵaý salasyn da nazardan tys qaldyrmaı, aldaǵy mindetterdi atap ótti. Qoǵam arasynda talqyǵa túsken memlekettik til máselesin de kún tártibinen qaldyrmaı, qazaq tilin bilý otanshyldyqtyń belgisi ekenin jetkizdi. Sonymen qatar qoǵam arasynda beleń alyp bara jatqan áleýmettik jelilerdegi bir kúndik ataqqumarlyq, vaksınaǵa qarsy eldi úgitteý syndy ózekti máseleler qaýipti qubylys ekenin jáne zııaly qaýym tarapynan osyndaı máseleler udaıy nazarda bolý qajettigin atap ótti. Joldaýdaǵy qýantarlyq jańalyq – eń tómengi jalaqy 42 500 teńgeden 60 myń teńgege deıin ósetini. Atalǵan tapsyrma 2022 jyldyń 1 qańtarynan bastap iske aspaq. Mádenıet salasy, kitaphanashy, muraǵatshy, tehnıkalyq qyzmetkerlerdiń materıaldyq jaǵdaıy nazardan qalmaı, aldaǵy 5 jylda jalaqyny jyl saıyn 20 paıyzǵa ósirý týraly tapsyrma – elimizdegi 600 myńnan asa qyzmetkerge qoldaý bolmaq. Joldaýdy iske asyrý halyq qalaýlylarynyń da jiti nazarynda. Bizdiń tarapymyzdan, ıaǵnı óńirimizdiń 300-den asa depýtaty Joldaýdy bir kisideı júzege asyryp, iri qalalardan shalǵaı aýyl turǵyndaryna deıin mańyzdy qujatty nasıhattaý – jumysymyzdyń bir baǵyty bolmaq. Bul úshin máslıhat depýtattary aqparattyq-nasıhattyq top quramyna engizilmek.
Jalpy, VII shaqyrylymdaǵy Almaty oblystyq máslıhatynda 360 halyq qalaýlysy el damýy jolynda eńbek etip keledi. Onyń ishinde oblystyq máslıhattyń 45 depýtaty bar. Jyl basynan beri oblystyq máslıhattyń 7 sessııasy ótip, óńirdiń damýy jolyndaǵy mańyzdy máseleler qaralyp, asa jaýapty sheshimder qabyldandy. Áleýmettik-ekonomıkalyq damý baǵytynda 46 sheshim, onyń ishinde 3 normatıvti-quqyqtyq qaýly bekitildi. Qaralǵan máselelerdiń ishinen óńirdiń damý baǵdarlamasy, memleket-jekeshelik áriptestik jobalary, týrızm ınfraqurylymynyń damýy, tekserý komıssııalarynyń qyzmeti, avtomobıl joldary, jastar saıasatynyń iske asýy, densaýlyq saqtaý salasynyń jaǵdaıy jáne ózge de ózekti máseleler bar. Atap aıtsaq, bıylǵy 1-jartyjyldyqtyń qorytyndysy boıynsha túsken kirister kólemi 114,7 paıyzǵa oryndalǵanyn eskere otyryp jáne shuǵyl sheshimdi talap etetin shyǵyndardy qarjylandyrý maqsatynda salyqtyq túsimder boljamyn 30 mlrd teńgege arttyrý týraly usynys oblystyq ekonomıka jáne bıýdjettik josparlaý basqarmasynan engizilip, máslıhat sessııasynda bekitildi.
Máslıhat qyzmetindegi baǵyttardyń biri – turaqty komıssııalardyń jumysy. Jyl basynan beri 23 otyrys uıymdastyrylyp, ár sala boıynsha 39 másele qaraldy. Olardyń qatarynda, joldardy jóndeý, bilim, turǵyn úı-kommýnaldy sharýashylyq, jumyspen qamtýdyń jol kartasy, densaýlyq saqtaý, qurylys, aýyl sharýashylyǵy, ınfraqurylymdy damytý, elektroenergetıka, ekologııa, áleýmettik qorǵaý, jumyspen qamtý, jer qatynastary jáne jol kólik salasy syndy asa mańyzdy baǵyttardyń nátıjesi talqylandy. Mysalǵa, turǵyn úı-kommýnaldyq sharýashylyǵy jáne qurylys máseleleri jónindegi turaqty komıssııa músheleri Almaty oblysynda «Múliktiń menshik ıeleri birlestigin nemese jaı seriktestik» ınstıtýtyn engizý jónindegi reformany júzege asyrý aıasynda 48 túsindirme jumysyn, 16 selektorlyq jıyn, turǵyndardyń qatysýymen 1013 jınalys ótkizdi.
Oblystyq máslıhattyń janyndaǵy qoǵamdyq keńestiń 4 otyrysy ótti. Keńes músheleri oblystyń 2021 jylǵy bıýdjetine ózgerister men tolyqtyrýlar engizý, óńirdiń 2020 jylǵy áleýmettik-ekonomıkalyq damýy men 2021 jylǵy mindetteri, qatty turmystyq qaldyqtardy jınaý, suryptaý, joıý jáne kómý máseleleri, memlekettik organdar tarapynan kórsetiletin memlekettik qyzmettiń sapasyna qoǵamdyq monıtorıng júrgizý nátıjeleri syndy máselelerdi qarap, tıisti usynys-eskertpeler berdi. Sonymen qatar jergilikti atqarýshy jáne ókildi organdardyń normatıvti-quqyqtyq aktilerdiń 20 jobasyn talqylady. Almaty oblysynyń máslıhaty men tekserý komıssııasy arasyndaǵy sybaılas jemqorlyqqa qarsy kúrestegi ózara is-qımyl týraly memorandýmdy iske asyrý sheńberinde Oblystyq tekserý komıssııasymen 2 birlesken otyrys ótkizildi.
Nur Otan partııasy «О́zgerister joly: Ár azamatqa laıyqty ómir!» saılaýaldy baǵdarlamasyn iske asyrý jónindegi Jol kartasynyń iske asyrýyn baqylaý maqsatynda oblystyq máslıhat depýtattary, turaqty komıssııa músheleri 2021 jyldyń 3-10 maýsym aralyǵynda aýdandar men qalalarda áleýmettik sala boıynsha kúrdeli jóndeý jumystary júrgizilip jatqan 9 mádenıet úıi jáne 34 mekteptiń qurylys nysandaryna monıtorıng júrgizdi. Baǵdarlama aıasynda oblys boıynsha jańadan 7 óndiris orny ashyldy. Sonymen qatar 506,3 myń sharshy metr turǵyn úıdiń qurylysy josparlanýda, onyń ishinde bıýdjet esebinen bıyl 2 603 páterli 521 turǵyn úı salynbaq. Alǵashqy jartyjyldyqta 245 otbasy, onyń ishinde 15 kópbalaly otbasy baspanaly boldy. Budan bólek, 3 dárigerlik ambýlatorııa, 89 balabaqsha, 2 sport-saýyqtyrý kesheni, 106,5 shaqyrym sýmen qamtý nysandary, 509 shaqyrym gazben qamtý nysandary salynyp, 41,9 shaqyrym avtomobıl joldary jóndeldi.
Depýtattardyń saılaýaldy baǵdarlamasyndaǵy mıssııanyń biri – azamattardyń máselelerin sheshý jáne quzyrly organdar arasynda altyn kópir bolý. Osy oraıda depýtattar jyl basynan azamattarmen keri baılanys ornatýda saıası partııalardyń qoǵamdyq qabyldaý alańdarynda turǵyndardyń máselelerin qarap, nátıjeli jumys atqardy. Halyq qalaýlylary 738 qabyldaý ótkizip, 1 005 adamdy qabyldady. Qabyldaýlardyń nátıjesinde 646 ótinish nemese bar máseleniń 64,2 paıyzy oń sheshim tapty. Qalǵan 359 másele baqylaýda. Halyq qalaýlylary karantın talaptarynyń kúsheıýine oraı, áleýmettik jelilerdiń múmkindigin keńinen paıdalanyp, qoǵamdyq qabyldaýlardy onlaın ótkizýde. Máselen, saıası partııalarmen birlese ótkizilgen «Depýtatqa saýal qoı» aksııasy aıasynda Instagram, Facebook jelileri arqyly 360-tan astam tikeleı efır júrgizilip, oǵan 50 myńnan astam halyq qatysty. Depýtattar jelilerdegi tikeleı efırdi odan ári jalǵastyrýdy josparlap otyr. Máslıhat depýtattarynyń jumysyn júıelendirý, buqaralyq aqparat quraldarymen jumys, halyqpen keri tyǵyz baılanysty ornatý, zaman talabyna saı jańa zańdardyń iske asyrylýy, qazirgi tańda normatıvti-quqyqtyq aktilermen, zańdarǵa engizilgen ózgeristerdiń baǵyttarymen tanystyrý maqsatynda oblystyq máslıhattyń depýtattarymen jáne aýdandyq qalalyq máslıhat apparaty qyzmetkerleriniń qatysýymen jergilikti jerlerde kezdesýler ótkizildi.
Halqymyzda «Qaıyr qylsań – bútin qyl» degen maqal bar. Osy oraıda halyq qalaýlylarynyń qaıyrymdylyq baǵytyndaǵy isteri kópke úlgi. Atap aıtsaq, jyl basynan beri 5 myńnan astam jetisýlyq azamatqa jalpy somasy 90 578 500 teńge kóleminde qaıyrymdylyq kómek kórsetilip, muqtaj jandardyń qajettiligi óteldi. Sonymen qatar «Mektepke jol» aksııasy aıasynda óńir depýtattary jalpy 25 832 600 teńge kólemindegi qarajatqa 1 107 balany qajetti mektep quraldary, kıim-keshektermen qamtamasyz etti. Bıylǵy qurǵaqshylyq elimizdiń keıbir óńirlerindegi jem-shóptiń jetispeýshiligin týdyrdy. Soǵan oraı halyq qalaýlylary Mańǵystaý oblysyndaǵy mal azyǵynyń jetispeýshiligine birden nazar aýdaryp, qoldaý kórsetti. Barlyq depýtattar osyndaı ıgilikti isterdiń uıytqysy bolýdan tartynǵan emes jáne bul baǵyttaǵy jumysty jalǵastyra bermek.
Janbolat JО́RGENBAEV,
Almaty oblystyq máslıhatynyń hatshysy
