Kúzgi dalanyń dıdaryna jup-juqa sary boıaý jaǵylyp qalypty. Berekeniń beınesi ispetti qutty altyndaı jalt-jult etken sarǵysh boıaý egindi alqaptyń ústine qonaqtaǵan. Qaı tarapqa qarasań da, astyq úshin arpalysyp jatqan eńbek adamdaryn kóresiń. Dál osyndaı bereke úshin bel býyp, eńbek etip jatqan dala erlerin Atbasar qalasynan taıaqtastam jerdegi egin alqabynan keziktirdik. Bizdi tánti etkeni, seksennen asqan qart dıqan Rýbık Manýkıannyń ókshesin basyp kele jatqan keıingi tolqynǵa aqyl-keńesin aıtyp, eńbek maıdanynyń aldyńǵy shebinde júrgeni.
– Jastaıymyzdan dala syryn jadymyzǵa jattap óstik, – deıdi qart dıqan, – dál bıylǵydaı qurǵaqshylyqty kópten beri kórmep edik. Alańdaý basym boldy. Bizdiń basty baılyǵymyz – osy altyn astyq emes pe? Kóktemde de kelip kún raıynan kókirekke túıgenimdi aıtyp ketkenmin. Táýir astyq alý úshin tájirıbeden qol úzbeý kerek. Ozyq tehnologııa degenimiz jergilikti jerdiń ereksheligimen qosa órilse ǵana tabysty bolady. Bıyl kóktem erte kelgenimen, topyraq kópke deıin jylynǵan joq. Al sýyq jerge dán salsań buǵyp jatady da, boıyndaǵy ylǵalyn joǵaltyp, kúshi kemip, óne almaıdy. О́ngen kúnniń ózinde dál bıylǵydaı qurǵaqshylyq bolsa, boı salyp jaıqalyp ósip ketýi qıyn.
Az-kem tájirıbesimen bólisken qart dıqan el Prezıdenti Qasym-Jomart Toqaevtyń taıaýdaǵy halyqqa joldaǵan «Halyq birligi jáne júıeli reformalar – el órkendeýiniń berik negizi» Joldaýyna toqtaldy. Ásirese, «egis alqabyna ár jyly ártúrli daqyl egý talabyn saqtaý úshin tıisti baqylaýdy kúsheıtken abzal» degen oı kóńilinen shyqqan. Jalpy dıqan qaýym jerdiń qutyn ketirip almaýdy kóbirek oılaıdy. Ol úshin egistikke egiletin daqyl túrlerin aýystyryp otyrǵan durys. Kútilmegen jerden bereke qashady.
Qurǵaqshylyq jyldyń ózinde ár gektardan 10 sentnerden ónim jınalýda. Bul bıylǵy jyl úshin táp-táýir jaqsy ónim. Dál qazir oblystaǵy gektar berekesi ortasha eseppen 7 sentnerden aınalyp turǵanda, atbasarlyq dıqandardyń úmiti aqtalǵan syńaıly. Endigi mindet, jerde óngendi jerde qaldyrmaı, ýaqytynda jınap alý.
– Kúnniń ashyq kezin tıimdi paıdalanýdamyz, – deıdi kombaınshy Iýrıı Gýzev, – qazan týsa súmbilege iligip qalýymyz múmkin, sondyqtan bar kúsh-jigerdi jumyldyrǵanymyz abzal. Onyń ústine qazirgi sheteldik kombaındardyń ónimdiligi de aıta qalarlyqtaı ǵoı. Rýbık Manýkıan aqsaqal kelgen saıyn tańyrqap, qyzyǵyp ketedi. Aǵa býynnyń qanshalyqty qııapat qıyndyqqa shydaǵandyǵyn sol kisiniń aýzynan estigen saıyn búginginiń jumysy olarǵa qaraǵanda oıynshyq sııaqty bolyp kórinedi. Kombaınnyń ishi jyp-jyly ári jaıly, barlyq jumys kompıýter arqyly atqarylady. Burynǵydaı jan qınaıtyn qol eńbegi joq deseń de bolar.
Bir qýanarlyǵy, jazdyń alǵashqy aılary eresen ystyq bolǵandyqtan bıylǵy astyqtyń qamyrlylyǵy óte joǵary eken. Ázirge 31 paıyzdyń tóńireginde. Astyqty alqapqa qaraǵan saıyn janyń jadyraıdy. Keıbir alqaptarda ara-kidik kezdesip qalatyn aramshóp ataýlydan ada. Tap-taza, móp-móldir. Bul da qarapaıym dıqandardyń mańdaı teriniń óteýi ǵoı.
Ymyrt úıirilip, kóz baılana bastaǵan ýaqyt. Astyqty alqaptaǵy tehnıkanyń jaryǵy samaladaı jarqyrap tur. Máńgilik eldiń júregińdi ýyljytatyn nury ispetti.
Aqmola oblysy,
Atbasar aýdany
