Eń áýeli ekonomıka, basqasy sonan keıin bola jatar dep edik. Odan ne shyqqanyn kózimizben kórip otyrmyz... Ulttyń rýhy kóterilmese, onyń eńsesi de kóterilmeıtinin tarıh baıaǵyda-aq aıtyp qoıǵan. «Adamdy adam qylǵan – kitap, adamzat qylǵan – kitaphana» degendi aıtyp, Ábish (Kekilbaı) aǵam bizdiń adasyp bara jatqanymyzdy elden buryn baıqaǵan-dy. Adamzattyń osy kúnge deıin jıyp-tergen aqyl-oıy osy kitaphanalarda jatyr. 90-shy jyldary talapaıǵa túsken de osy kitaphanalar edi... Teledıdar men kompıýterlerden azdap boı sýytyp, kitaphanalarǵa qaıta barmasaq, taǵylyqqa qaraı taltańdap júre berýimiz múmkin? Es jııatyn kezeń keldi.
Bizdi kitaphanalar kútip tur...
On adamnyń jazýshy ǵoı, segizi,
Kernegen keýdesin oı teńizi.
Qudaı jazǵan Quran degen Kitap bar.
... Kitap sondaı bolý kerek negizi.
Qaraormandaı, qarasy,
Qaptap turǵan kitaptarǵa qarashy:
Aspanmenen jerdeı boldy,
Alla men
Adam jazǵan kitaptardyń arasy.
Kitap ta bar ashyp qalsań, ne túrli,
Kóktiń nury aımalaıtyn betińdi:
Mine, Abaıdyń eki tomy, ishine
Eki dúnıe syıyp ketken sekildi...
Qarsy aldyńnan Qasym shyǵyp,
Egilse,
(Qara tomy qalaı onyń, senińshe?)
Qulaǵyna,
(Telmirgende qaǵazǵa)
Oǵan Qudaı sybyrlaǵan, menińshe.
«Alla-aı!» deımin Aqtamberdi
tolǵasa,
(Aqylyma syımaıtyn jan ol da asa)
Aıta almaıdy mundaı sózdi Alashqa,
Jumyr basty pende,
Qudaı bolmasa!
On adamnyń jazýshy ǵoı, segizi,
Kernegen keýdesin oı teńizi.
Qudaı jazǵan Quran degen Kitap bar.
... Kitap sondaı bolý kerek negizi.
Serik AQSUŃQAR,
aqyn, Memlekettik syılyqtyń laýreaty
