El Prezıdenti de qazaq tilin damytý memlekettik saıasattyń basym baǵytynyń biri bolyp qala beretinin aıtty. Sondyqtan da búkil Úkimet músheleri, barlyq memlekettik organdar osy baǵytqa qaraı bet burýy qajet. Sebebi rasymen de qazaq tili qazirgi tańda bilim men ǵylymnyń, mádenıet pen is júrgizýdiń tiline aınalyp keledi.
Ekinshi másele – aýylsharýashylyq salasyndaǵy jaıylymdyqqa qatysty. Kúni keshe elden keldik. Jazda el-eldi, aýyl-aımaqtardy aralaǵanda, halyqpen kezdeskende osy máselege qatysty kóptegen suraq qoıyldy. Belgili bir adamdardyń myńdaǵan gektar jerlerdi ıemdenip alǵanyn halyq ashynyp aıtyp otyr. Osy jaıtqa erekshe kóńil bólgen Memleket basshysy Úkimetke naqty tapsyrmalar berdi. Máseleni túbegeıli sheshetin batyl sharalar qabyldaýdy mindettedi. Eń bastysy – jaıylymdyq jerlerdi ıelenip otyrǵan qojaıyndardyń quqyqtyq mártebesin aıqyndap beretin «Jeke qosalqy sharýashylyqtar týraly» bólek zań qabyldaý qajettigi aıtyldy. Aldymyz – kúz. Jaılaýdaǵy mal aýylǵa túskende jaıylymdyq máselesi taǵy ýshyǵaıyn dep tur. Aýylda jemshóp az. Sondyqtan aýyl halqyna orman sharýashylyǵy jerlerin paıdalanýǵa berý kerek dep oılaımyn. Bul jerler jeke sharýalardyń, qarapaıym halyqtyń ıgiligine berilýi kerek.
Úshinshi másele – Qasym-Jomart Toqaevtyń eń tómengi jalaqy mólsherin kóbeıtýge qatysty tapsyrmasy. Elimizde eń tómengi jalaqy mólsheri 2018 jyldan beri ósken joq. Bizdegi eń tómengi jalaqy deńgeıi TMD-nyń birqatar elinen artta qalyp qoıǵan. Osyǵan oraı Prezıdent keler jyldan bastap eń tómengi jalaqyny 60 myń teńgege deıin kóterý týraly sheshim qabyldady. Shyndap kelgende, bul – el-jurttyń eń kóp kóteretin ózekti suraǵy bolatyn. Áleýmettik saladaǵy qyzmetkerlerdiń eńbekaqysyn kóterý – búkil halyq sheshimin kútip otyrǵan máseleniń biri.
Janarbek ÁShIMJANOV,
Májilis depýtaty
