Arys qalasynyń ákimi Gúljan Qurmanbekova Joldaýda berilgen tapsyrmany oryndaý boıynsha jumys qarqyndy júrgiziletinin aıtty.
– Búgingi tańda Arys qalasynda jeke kásipkerlerdiń mektep salýǵa degen qyzyǵýshylyqtary óte joǵary bolyp otyr, – deıdi qala ákimi.
О́z kezeginde mektep qurylysyn bastaǵan jeke kásipker Klara Nurmanova Ontam eldi mekeninde mektep salý isi kópten beri oıda júrgenin aıtty.
– Halyqtyń jáne qala basshylyǵynyń qoldaýymen bul is jolǵa qoıylyp otyr. Kópshilikke rahmet aıtamyn. Eldi mekenniń turǵyndary jumyspen qamtylsyn dep, oqýshylar qysta tońbaı, jaqyn jerdegi mektepke barsyn dep halyq úshin ıgilikti is bastap jatyrmyz. Mektep 150 oryndyq bolady. Oǵan óz esebimizden 600 mln teńge qarjy bólemiz. Jerdi memleketten aýksıon arqyly satyp aldyq, – dedi Klara Nurmanova.
Al Arys qalalyq adamı áleýetti damytý bóliminiń basshysy Áshimhan Mombekov bolsa, búgingi tańda qalada 37 mektep bar ekenin jetkizdi.
– Onda bilim alýshylar sany 20 myńǵa jýyqtaıdy. Osydan 2 jyl buryn shaǵyn aýdandar boıynsha bala sanynyń artýyna oraı birneshe mektep qurylysy bastalǵan. Endi, mine, Ontam eldi mekeninde 150 oryndyq mekteptiń qurylysyn jeke kásipker qolǵa alyp otyr. Taǵy eki mekteptiń qurylysy oblystyq bıýdjet esebinen qarjylandyrylady, – deıdi Á.Mombekov.
2,5 gektar shamasyndaǵy aýmaqty alyp jatqan mektep mańynda sport alańy da salynady. Qurylys kezinde jergilikti 50 azamat jumyspen qamtylady. Merdiger kompanııa nysandy aldaǵy oqý jylynda tolyq bitirip, paıdalanýǵa berýdi kózdep otyr.
Aıta keteıik, búgingi tańda Ontam aýylynda «Yntymaq» atyndaǵy shaǵyn jınaqty bastaýysh mektep qana bar. Ol jerde 1-4 synyp aralyǵyndaǵy 50 bala bilim alady.
Al 5-11-synyptar aralyǵyndaǵy 42 bala Aqdala aýylyndaǵy S.Erýbaev atyndaǵy mektepke qatynap oqıdy. Jalpy alǵanda, aýyl turǵyndarynyń sany 500-ge jýyq bolsa, onyń 105-i mektep jasyndaǵy balalar.
