Pedagogıkalyq mamandyqty tańdaǵan úzdik talapkerlerdiń qatary kúrt kóbeıdi. Kezinde basqa salaǵa oıysyp ketkender orala bastady. Osylaısha, báseke paıda boldy. Al báseke óz kezeginde sapany arttyrady.
Prezıdent Joldaýda jaǵymdy jańalyqty jetkizdi. Biz qansha balalardy olımpıadalarǵa daıyndaımyz. Sońǵy ýaqytta qazaqstandyq oqýshylar álemdik dodalarda oq boıy ozyq kelip, joǵary nátıjeler kórsetip, altynnan, kúmisten medal taǵynyp júr. Osyndaı oqýshylardy ózimiz ǵana yntalandyryp qoıamyz. Shetelderde mundaı balalardy prezıdent rezıdensııasynda qabyldap jatady. Mine, endi bizde de Memleket basshysy halyqaralyq olımpıadalardyń jeńimpazdary men júldegerlerine qoldaý kórsetiletinin aıtty. Budan bylaı halyqaralyq olımpıadalardyń darabozdaryna joǵary oqý ornyna túsý úshin konkýrstan tys granttar berilmek. Buǵan qosa bir rettik aqshalaı syıaqy da tólenedi.
Ǵylym men tehnologııanyń damyǵan zamanynda pedagog zamanaýı talaptarǵa saı ózin árdaıym jetildirip otyrýy kerek. Osy másele eskerilgendeı, Memleket basshysy Joldaýynda muǵalimderdi qazirgideı bes jylda emes, úsh jylda bir ret qaıta daıarlyqtan ótkizýdi tapsyrdy. Keıde aqyly kýrstardan ótýimizge týra keledi. Al Prezıdent endi ustazdardyń kýrstan ótý úshin óz qaltasynan aqsha tóleýine jol berilmeıtinin shegelep aıtty.
Budan bólek Joldaýda orta bilim berý júıesindegi ózekti problemanyń biri – mektepterdegi oryn tapshylyǵyna toqtaldy. Qazirdiń ózinde elimizde 225 myń oqýshyǵa oryn jetispeıdi. Bul máseleni tez arada sheshpesek, 2025 jylǵa qaraı oryn tapshylyǵy 1 mıllıonǵa jetýi múmkin eken. Osyǵan oraı Memleket basshysy 2025 jylǵa deıin keminde 800 mektep salý týraly tapsyrma bergen bolatyn. Keshegi halyqqa Joldaýynda oqý oshaqtarynyń sanyn myńǵa jetkizýdi mindettedi. Mindet oryndalyp, jospar júıeli júzege assa, úsh aýysymdy mektepter máselesi kún tártibinen túser edi.
Gúlzına BEKMUHAMBETOVA,
fızıka-matematıka pániniń muǵalimi, «Úzdik pedagog-2019» baıqaýynyń jeńimpazy
