«Maqtaaral-4011» maqta sortyn 5 gektar jerge ekken qojalyq birinshi terimniń ózinde 25 sentnerden ónim aldy. Maqtanyń árbir kılosyn 30 teńgeden jergilikti aýyl turǵyndary terýde. Qojalyq basshysy Qanat Aıbotaevtyń aıtýynsha, jınalǵan ónim «Cotton-Maqta» JShS maqta óńdeý zaýytyna ótkiziledi.
«Aýdan boıynsha 3 myń gektardan astam maqtalyq alqapqa defolıasııa jumystary júrgizilgen. Maqta jınaý tehnıkalary, maqta zaýyttary men qabyldaý beketteri tolyq daıyn tur. Kúzgi jıyn-terim naýqanyn sátti ótkizý – bárimizdiń ortaq mindetimiz», deıdi aýdannyń aýyl sharýashylyǵy bóliminiń basshysy Baıazıt Álimqul.
Aýdandaǵy maqta terim naýqany úshin 567 traktor, 850 dana tirkeme jáne 162 dana maqta terim mashınasy daıyndalǵan. Jospar boıynsha maqtanyń 70 paıyzy tehnıkanyń kúshimen teriledi. Aýdanda 8 maqta óńdeıtin zaýyt pen 64 maqta qabyldaý beketi jumys isteıdi. Al sharýalarǵa kómek retinde memleket tarapynan jeńildetilgen baǵamen tıisti deńgeıde janar-jaǵarmaı bosatylýda.
Sondaı-aq Jetisaı aýdanynyń sharýalary da maqta terimin bastady. Sharýalar bıyl «aq altynnyń» ónimdiligi jaqsy bolǵanyn aıtady. Maqta sharýashylyǵymen turaqty aınalysatyn sharýanyń biri – Sholpanqudyq eldi mekenindegi «Nurǵısa» sharýa qojalyǵy bıyl 5 gektar jerge maqta tuqymyn sepken.
«Aýyl turǵyndary maqtanyń árbir kılosyn 20 teńgeden terýde. Maqta ózge daqyldar sııaqty 2-3 aıda ónim bermeıdi. Uzaq ýaqyt pisetin bolǵandyqtan kútimdi de kóp jasaımyz. Osyndaı beıneti kóp sharýashylyqqa qolaıly jaǵdaı jasap, sý máselesin sheship bergen aýdan basshylaryna alǵystan basqa aıtarymyz joq. Egistik alqapty ýaqytyly sýǵaryp otyrdyq. О́nim ázirge jaman emes. Bastysy maqta baǵasy joǵary bolyp, sharýalardyń eńbegi jansa eken», deıdi qojalyq tóraǵasy Nurǵısa Seıilbekov.
Aıta ketelik, bıyl Jetisaı aýdanynda 44 myń gektardan astam jerge maqta egilgen. Maqta jınaý naýqanyna 200-den astam kombaın daıyndalǵan.
Túrkistan oblysy
