«Jaqyndap qalǵan JRVI, ıaǵnı tumaý maýsymyna aıryqsha toqtalyp ótkim keledi. Bıyl bıýdjet qarajaty esebinen Reseıde shyǵarylǵan «Grıppol+» vaksınasynyń 2,5 mln dozasy satyp alyndy. Vaksına quramynda aldaǵy maýsymǵa qarsy shtamm bar. Bul respýblıkanyń jalpy turǵyndarynyń 13 paıyzyn qamtýǵa múmkindik beredi. Dúnıejúzilik densaýlyq saqtaý uıymynyń usynysy – 10 paıyz. JRVI men tumaýǵa qarsy vaksınasııa 15 qyrkúıekte bastalady», dedi ol Ortalyq kommýnıkasııalar qyzmetindegi baspasóz máslıhatynda.
Birinshi vıse-mınıstrdiń aıtýynsha, osyǵan oraı elimizdiń Bas memlekettik sanıtar dárigeriniń qaýlysy qabyldanǵan.
«Memlekettik bıýdjet qarajaty esebinen halyqtyń eń álsiz toby vaksınasııalanatyndyǵyn atap ótkim keledi. Olar: medısına qyzmetkerleri, medısınalyq uıymdarda dıspanserlik esepte turǵan balalar, jetim balalar jáne ata-anasynyń qamqorlyǵynsyz qalǵan balalar jáne basqalary. Buǵan qosa, jumys berýshilerdiń jáne halyqtyń jeke qarajaty esebinen de vaksınasııa júrgiziledi», dedi Marat Shoranov.
Onyń aıtýynsha, reseılik vaksınadan bólek Qazaqstan aýmaǵynda taǵy 3 óndirýshiniń 4 vaksınasy tirkelgen. Atap aıtqanda, Sanofı-Paster (Fransııa) óndirgen «Vaksıgrıp Tetra», Inflıývak (Nıderlandy) men Sınovak Bıotek (Kıtaı) kompanııalary óndirgen vaksınalardy da alýǵa bolady.
