Bankter klıent aýdıtorııasyn keńeıtý úshin túrli jobalar men jeńildikter uıymdastyrady. Eldegi 25 banktiń 17-si jeke tulǵalarǵa arnap karta usynyp otyrsa, sonyń 9-y – úzdik ondyq qataryndaǵylar. Finprom agenttigi Gold klasyna deıingi kartalardyń múmkindigin zerdelep kórgen eken. 0,5-2 paıyz aralyǵyndaǵy kepildendirilgen keshbekti Bank RBK usynady. Eger klıentte depozıtindegi qarjy 1 mln teńgeden joǵary bolsa 1 paıyz kepildi keshbekke taǵy 1 paıyz qosylady, kartadaǵy 100 myń teńgeden astam qaldyq úshin – 1 paıyz jáne taǵy kontaktisiz tólem úshin 1,5 paıyz beriledi. Nátıjesinde, 4,5 paıyz keshbek jınalady.
4 paıyzǵa deıin shekteýli merzimde «Eýrazııalyq bank» kartasy boıynsha alýǵa bolady. Onda kepildi keshbek nebári 0,5 paıyzdy quraıdy, alǵashqy úsh aıda ol eki eselenedi. Somasy 1 mln teńgeden assa, depozıt úshin de 1 paıyz qosylady, kontaktisiz tólem úshin 2 paıyz esepteledi.
«Bankterden asa iri keshbekti súıikti kategorııalar arqyly alýǵa bolady (sýpermarket, janar-jaǵarmaı beketi, apteka, sport taýarlary, t.b.) Súıikti kategorııań úshin eń úlken keshbek – Bank RBK-da – 20 paıyzǵa deıin. Odan soń 15 paıyzǵa deıin keshbek beretin ForteBank pen Jusan Bank, 10 paıyzǵa deıin beretin – «Bank SentrKredıt» keledi. Kaspi Bank ondaı kategorııa aıasynda 3 paıyzǵa deıin beredi, óıtkeni kategorııany banktiń ózi tańdaıdy. Al «Eýrazııalyq bank» súıikti kategorııa úshin nebári 1 paıyz qosady» dep jazady Finprom.
«Alfa-Bank» klıentterge 50 myń teńge kólemindegi kepildi keshbek usynýǵa daıyn. Biraq bir jyl tolǵan soń ǵana. Taǵy bir talaby – sol bir jylda karta arqyly 1,2 mln teńge jumsalýy tıis. Sondaı-aq «Bank Hoým Kredıt» te 33 paıyzǵa deıin keshbekpen jarylqaıdy. Alaıda onyń talaby da – taýdaı: valıýtalyq depozıtte 25 myńnan 100 myń dollarǵa deıin aralyqta aqsha jatýy tıis jáne karta arqyly aı saıyn 125-500 dollar kóleminde saýda jasalýy kerek.
