Iá, О́skemendi saıabaqtar men alleıalar shahary desek te bolady. Qazaqstanda teńdesi joq Sol jaǵalaý parkine tabanyńyz tıse, qalanyń qaýyrt tirligin bir sátke umytyp, bel-belesterdi, qyrqa-qyrattardy asyp ketkendeı kúıde bolasyz. Qulaq tundyrǵan kóliktiń gýili sap tıylyp, bulbuly saıraǵan orman-toǵaıdy aralap kete barasyz... Qalaǵa at basyn burǵan meımandardyń deni osy saıabaqtardy saıalaıdy, qaıyq minip Ertisti órleıdi. Velosıpedpen shahardy shıyrlap kelemin degen adamǵa da múmkindik bar. Damylsyz damyp kele jatqan qaladaǵy nysandar týraly tize berýge bolady. Bárinen de qyzyǵy, Arbatqa qoshqar múıiz oıýmen bezendirilgen jasyl kabına qoıyldy. Mańdaıshasyna О́skemenniń belgisi tańbalanypty. Áp-ádemi. Bul nendeı dúńgirshek deısiz ǵoı. Sóıtsek, Arbatta serýendep júrgen adam munda kirip, unaǵan kitabyn alyp oqýǵa bolady eken. Nóser tókse, dúńgirshek ishinde ilýli turǵan qolshatyrlardy da paıdalanýǵa bolady. Tek qana alyp ketpeı, keıin qaıta ornyna qoıýyńyz qajet. Mundaı praktıka shetelderde bar bolǵanymen, bizdiń mádenıetimizge qanshalyqty saı, ony ýaqyt kórseter.
– Qalanyń ósip-órkendep kele jatqanyna qýanamyz. Ásirese, mynaý topalań kezinde ár túıir qýanyshtyń baǵasy at basyndaı altynnan qymbat bolyp ketkeni ras. О́skemenniń kóshesine kúnine neshe márte shyqsańyz, sonshama qýanyshpen júzdesip qaıtasyz, – deıdi Arbatty aralaı ketip bara jatqan jazýshy Álibek Qańtarbaev.
Mundaı kabına alǵash ret mine, Arbatqa qoıyldy. Erteńgi kúnderi qalanyń basqa da bólikterine ornatylady. Eń bastysy, mádenıetti elderdegideı kútip ustasaq bolǵany. Aıtqandaı, kózge erekshe kórinetin dúńgirshekti foto zona retinde paıdalanýǵa da bolady.
О́skemen
