Qaırat Sháripbaev Prezıdentke ótken jylmen salystyrǵanda magıstraldi tasymaldaý kórsetkishi 14 paıyzǵa ósip, 65,4 mıllıard tekshe metrge jetkenin málimdedi. Ulttyq operatordyń tabysy 8 aıda 6 paıyzǵa artyp, 1,342 trıllıon teńge boldy. Taza paıdanyń kólemi – 55 paıyzǵa ósip, 304 mıllıard teńgeni qurady.
Memleket basshysyna bıyl otandyq gaz tutynýshylardy 158,8 mıllıard teńgege sýbsıdııalaý sharalary, sondaı-aq bıýdjetke 128,4 mıllıard teńge kóleminde salyq jáne basqa da tólemder túskeni jóninde aıtyldy.
Qaırat Sháripbaevtyń málimeti boıynsha kompanııanyń taza tabysy otandyq gaz tasymaldaý júıesin qalypty jaǵdaıda ustaýǵa jáne boryshtyq júktemesin azaıtýǵa baǵyttalady. «QazTransGaz» AQ kompanııalar toby segiz aı ishinde 995 mıllıon dollar kólemindegi kredıttik qaryzyn ótegen.
Memleket basshysyna gaz tasymaldaý salasynyń ınfraqurylymyn jańǵyrtý jáne damytý jobalaryn júzege asyrý, atap aıtqanda Mańǵystaý oblysynyń gaz tasymaldaý ınfraqurylymyn rekonstrýksııalaý, «Beıneý – Bozoı – Shymkent» magıstraldi gaz qubyrynyń ekinshi jelisin salý, Qashaǵandaǵy gaz óńdeý zaýyttarynyń qurylysy, sondaı-aq «QazTransGaz» aksıonerlik qoǵamyn sıfrlandyrýǵa baǵyttalǵan is-sharalar týraly baıandaldy.
Prezıdent elimizdi odan ári gazben qamtýǵa qatysty usynylǵan jobalar men is-sharalardy qoldaıtynyn aıtty.
Kezdesý sońynda Qasym-Jomart Toqaev Qaırat Sháripbaevqa elimizdiń gaz salasyn damytýǵa baǵyttalǵan birqatar mindet júktedi.
