Joldaýdaǵy aýyl sharýashylyǵynyń ulttyq ekonomıkanyń negizgi qozǵaýshy kúshine aınalatyny týraly qaǵıda aýyl sharýashylyǵy mamandarynyń ǵana emes, el jaǵdaıyn oılaıtyn búkil qaýymnyń oıyn tolqytyp, tereńde jatqan armany men úmitin, syry men shynyn shaıqady. «Aýyl sharýashylyǵy jerlerin tolyq ekonomıkalyq aınalymǵa túsirý múmkindigi» týraly sóz – shyndyqtyń júzine týra qarap aıtylǵan, aýyl eńbekkerleriniń jarqyn bolashaqqa degen úmiti men talpynysyn kúsheıtetin turlaýly tujyrym.
Joldaýdaǵy áleýmettik mańyzy zor, ómirlik máni úlken oılardyń tutasqan bir jelisi qoljetimdi ári sapaly bilim týraly. «Bizdiń bilim berý júıemizdiń qoljetimdi ári ınklıýzıvti bolýy» jaıyndaǵy qaǵıda – Prezıdent Joldaýyndaǵy árbir otbasynyń, úlkenniń de, kishiniń de kókeıin tesken ózekti másele. Bul máseleniń sheshilip, is júzine asýyna qabileti men biliktiligi bar árbir maman óz tarapynan laıyqty úlesin qosýy abzal.
Memleket basshysynyń Joldaýynda áleýmettik mańyzy joǵary, árbir ata-ananyń, árbir qoǵam múshesiniń kóńilinde tunyp turǵan irgeli oılarmen sabaqtas ómirlik máni tereń iri mindetter tııanaqtalǵan, jalpyhalyqtyq, ulttyq, memlekettik mańyzy zor qaǵıdalar júıesi negizdelgen. Olardy naqty is-qımyl arqyly júzege asyrý memlekettik atqarý ınstıtýttarynan úlken jaýapkershilikti, kásibı biliktilik pen iskerlikti talap etedi. Bilim, ǵylym salasyndaǵy oqý oryndary men zertteý ınstıtýttary Prezıdent Joldaýynan týyndaıtyn mindetterin taldap, talqylap, ony júzege asyrý maqsatynda belsendi izdenis jumystaryn bastap ketti.
Janǵara DÁDEBAEV,
Ál-Farabı atyndaǵy Qazaq ulttyq ýnıversıteti janyndaǵy Abaı ǵylymı-zertteý ınstıtýtynyń dırektory, fılologııa ǵylymdarynyń doktory, professor
