– Paralımpıadaǵa kók baıraqty jelbiretip, Ánuranymyzdy shyrqatý úshin barǵan edim. Jeńiske jetý úshin bapkerimniń keńesin, ózimniń tájirıbemdi tolyq paıdalanýǵa tyrystym. Biraq sál sáttilik jetispedi. Endi Parıjde ótetin Paralımpıadaǵa daıyndyqty bastaımyn. Sol kezde namysty qoldan bermeı, kúmisti altyn medalǵa aınaldyrýdy kózdep otyrmyn, – deıdi Paralımpıada oıyndarynyń kúmis júldegeri Ánýar Sarıev.
Paradzıýdodan el quramasynyń bas bapkeri Jandos Qııanovtyń aıtýynsha, jahan jurty kóz tikken dodaǵa barǵan sportshylardyń báriniń júldeger atanar múmkindigi bolǵan. Ásirese Ánýar Sarıev – álemdik reıtıngte alǵashqy úshtikke engen tatamı sheberi. Sol sebepten, ol ekinshi aınalymǵa qarsylassyz shyqqan. Al ekinshi kezeńde mońǵol sportshysyn jartylaı jeńispen utty. Onymen tartysty beldesýde saýsaǵyn aýyrtyp, murny synǵan. Soǵan qaramastan, kelesi aınalymda venesýelalyq Markos Blankony eki ádispen jeńgen edi. Alaıda aqtyq kezdesýde ázerbaıjandyq Výgar Shırınlıden utyldy.
Oblys ákimi Mahambet Dosmuhambetov Paralımpıadanyń kúmis júldegerleri Ánýar Sarıev, Temirjan Dáýlet pen Zarına Baıbatınaǵa Toyota kóligi men 2 bólmeli páter, 1 mıllıon teńge berdi. Paralımpıada júldegerleriniń sheberligin shyńdaǵan bapkeri Jandos Qııanovqa 4 mıllıon teńgeniń sertıfıkaty tapsyryldy.
– Bul – elimizdiń parasporty úshin tarıhı jetistik, qajyrly eńbek pen bıik namystyń, órshil rýhtyń jemisi. Eń bastysy, Atyraý sportshylarynyń el Táýelsizdiginiń 30 jyldyǵyna aıryqsha tartýy. Paradzıýdoshylar qara ormandaı jankúıeri men myńdaǵan jasqa qaısar minezdiń mánin uǵyndyrdy, – dedi Mahambet Dosmuhambetov.
Sondaı-aq Paralımpıada oıyndarynyń qatysýshylary Amanjol Janbota, Ǵalymjan Smaǵululy, Erlan О́tepov, Nurlan Dombaev, Erjan Sálimgereev pen olardyń jattyqtyrýshylaryna qurmet kórsetildi.
Atyraý oblysy
