– Bul maýsymǵa jarqyn premeralar, gastroldik óner kórsetýler josparlanǵan, sonymen qatar repertýarymyzdaǵy kórermen kózaıymyna aınalǵan súbeli spektalder mindetti túrde oryndalady. Biz alǵash ret demalystan keıin balet trýppasynyń tolyq quramymen jurtshylyqqa esigimizdi ashamyz, bul úshin shytyrman oqıǵaly taqyrypqa qurylǵan, qabyldaýǵa jeńil «Korsar» baletin tańdap aldyq. Barlyq ártister kórermendermen qaýyshatyn kúndi asqan yjdahattylyqpen asyǵa kútýde. Osy maýsym aýqymdy da mazmundy bolady degen úmittemiz, – dep pikirimen bólisti Altynaı Asylmuratova.
17 qyrkúıek kúni Bırbantony ónersúıer qaýymǵa Oljas Mahanbetálıev usynady. Teatrdyń jetekshi solısteri: Qazaqstannyń eńbek sińirgen qaıratkerleri Ánel Rústemova men Gaýhar Ýsına (Medora), Oljas Tarlanov, Arman Orazov (Konrad) jáne Qazaqstannyń eńbek sińirgen qaıratkeri Erkin Rahmatollaev (Qul Alı) ózderiniń jarqyn partııalaryn ortaǵa salady.
Baıronnyń attas poemasynyń jelisimen jasalǵan klassıkalyq balet repertýarynyń jaýhary onyń romantıkalyq jaıma-shýaqtyǵyn, erkindik súıgish rýhyn, kúshti qushtarlyǵyn saqtaıdy. Teńiz qaraqshylary – korsarlardyń ómirinen alynǵan oqıǵalar jelisine arnalǵan týyndy ártisterge barlyq partııalarda balet tehnıkasymen de, dramalyq darynymen de jarqyraı óner kórsetýge múmkindik beredi. 1856 jyly qańtarda Parıjde ótken premeraǵa kórermender bıletterdi 1,5 aıdan astam ýaqyt buryn satyp alýǵa týra keldi. Qoıylymnyń jetistigi óte zor boldy, al sahnalyq áserleri teatrlyq qoıylymdar tarıhyndaǵy eń úzdik dep tanyldy. Álemdik premeradan beri «Korsar» baleti óziniń tanymaldylyǵyn joǵaltqan joq.
«Egemen-aqparat»
