Álem • 10 Qyrkúıek, 2021

Aýǵanstanda tálipter jýrnalısterdi soqqyǵa jyqty

190 ret

kórsetildi

1 mın

oqý úshin

«Talıban» qozǵalysynyń sodyrlary Kabýlda áıelderdiń narazylyqqa shyqqanyn jarııalaǵany úshin eki aýǵan jýrnalısin uryp-soqqan, dep habarlaıdy Egemen.kz.

Gaýhar QAPASh

Aýǵanstanda tálipter jýrnalısterdi soqqyǵa jyqty

Bul týraly Reuters agenttigi málimdedi.

Agenttik málimetinshe, sodyrlar jýrnalısterdi reportaj jasap jatqan jerinen ustap, keıin olardy qamshymen aıaýsyz sabaǵan.

Zardap shekkender aýrýhanaǵa jetkizildi.

«Etilaat Roz gazetiniń jýrnalısteri tálipter ustaǵannan keıin soqqyǵa jyǵyldy. Eki tilshiniń basynda, betinde jáne denesinde qamshynyń izderi bar», delingen resmı habarlamada.

Jaqynda aýǵan áıelderi el basqarýǵa qatystyrýdy talap etip narazylyqqa shyqqan bolatyn. Al, tálipter ýaqytsha úkimettiń quramyn jarııalap, áıelder bılikte bola almaıtynyn aıtqan.

Bul aýǵan halqy jańa bılik saıasatyna narazylyq bildirgen alǵashqy aksııa emes. Jetinshi qyrkúıekte Kabýl turǵyndary Pákistannyń vedomstvoaralyq barlaý basshysy Faız Hamıdtiń qalaǵa kelýinen keıin kóshege shyqty. Narazylyq bildirýshilerdiń kópshiligi - áıelder. Aksııany taratý úshin tálipter ot jaǵyp, qatysýshylardy taıaqpen urǵany týraly habarlandy. Sol kúni narazylyqtar Kabýldyń soltústigindegi Parvan provınsııasynda, sondaı-aq eldiń batysyndaǵy provınsııa ortalyǵy Geratta boldy.