BUU-nyń Aýǵanstan boıynsha arnaıy ókili Debora Laıons BUU Qaýipsizdik keńesine bergen suhbatynda uıymnyń Aýǵanstandaǵy ǵımarattary tıisti túrde kúzetilgenimen, «Talıban» bılik basyna kelgennen beri aýǵan qyzmetkerlerine qysym kúsheıe túskenin aıtty.
«Bizdiń ulttyq qyzmetkerlerge qysym kórsetý jáne qorqytý dereginiń kóbeıgeni alańdaýshylyq týǵyzyp otyr. Biz óz qyzmetkerlerimizdi qoldaý jáne qaýipten qorǵaý úshin qoldan kelgenniń bárin jasaımyz. BUU aýǵan halqy úshin óte mańyzdy jumysty qyzmetkerleri qorqyp, erkin júre almasa durys oryndaı almaıdy», dedi Laıons.
Reuters tálipter bılik basyna kelerdiń aldynda 10 tamyzdan beri qorqytýlar, BUU keńselerin tonaý jáne qyzmetkerlerge shabýyl jasaý sııaqty ondaǵan oqıǵa týraly habarlady.
«Tálipter búkil el boıynsha BUU qyzmetkerlerine qarsy kúsh qoldanyp jatyr degen aqparat bizdi ashýlandyrady. Bulaı bolmaıdy. Buny shekten shyqqandyq dep aıtsaq artyq bolmaıdy», dedi AQSh-tyń BUU-daǵy ókiliniń orynbasary Djeffrı Delorentıs.
Ol tálipterdi BUU táýelsizdigi men beıtaraptyǵyna qurmetpen qaraýǵa shaqyrdy.
