Dóńgelek ústel barysynda Memleket basshysy Q.Toqaevtyń «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýynyń quqyq qorǵaý aspektileri talqylanyp, qylmystyq-prosestik zańnamany jetildirý, quqyq qorǵaýshylardyń quqyqtaryn qorǵaýdy kúsheıtý, balalarǵa qarsy qylmystyń aldyn alý jáne sybaılas jemqorlyqtyń aldyn alý tetikteri qaraldy.
Prezıdent janyndaǵy Adam quqyqtary jónindegi Komıssııa, Nursultan Nazarbaev Qory, Abaı atyndaǵy QazUPÝ-dyń Sorbonna-Qazaqstan ınstıtýty, «Astana» halyqaralyq qarjy ortalyǵy (AHQO), «Akselerator dobra. Izgilik elshisi» ulttyq eriktiler qozǵalysy, «Almaty Adaldyq Alańy» jobalyq keńsesi birlese uıymdastyrǵan sharaǵa Prezıdent janyndaǵy Adam quqyqtary jónindegi komıssııanyń Tóraǵasy, Nursultan Nazarbaev Qory atqarýshy dırektorynyń orynbasary Igor Rogov, QR UǴA korrespondent-múshesi, AHQO akademııalyq Keńesiniń múshesi Baqytjan Ábdiraıym, Abaı atyndaǵy QazUPÝ Basqarma tóraǵasy-rektory Darhan Bilálov, QR Sybaılas jemqorlyqqa qarsy is-qımyl Agenttiginiń Almaty qalasy boıynsha departamenti basshysynyń birinshi orynbasary Danııar Taýmurat, QR Prezıdenti janyndaǵy UQSK múshesi, Sorbonna-Qazaqstan ınstıtýtynyń dırektory, «Almaty Adaldyq alańy» jobalyq keńsesiniń jáne «Akselerator dobra: Izgilik elshisi» eriktiler qozǵalysynyń jetekshisi Aınur Sábıtova qatysty. Sondaı-aq sharaǵa onlaın-rejimde QR Prezıdenti Ákimshiliginiń Qaýipsizdik jáne quqyqtyq tártip bóliminiń meńgerýshisi Alekseı Kalaıchıdı, vıse-mınıstri Natalıa Pan jáne ál-Farabı atyndaǵy QazUÝ, L. N. Gýmılev atyndaǵy EUÝ-diń «Akselerator dobra: Izgilik elshisi» zań klınıkasynyń ókilderi men eriktileri, sondaı-aq zań salasyndaǵy sarapshylar onlaın-rejimde ún qosty.
Darhan Bilálov uıymdastyrýshylarǵa alǵysyn bildirip, el Prezıdentiniń bilim jáne ǵylym júıesin jetildirý jónindegi tapsyrmalaryn iske asyrýdyń mańyzdylyǵyn atap ótti. «Bul baǵyttar memleketimizdiń odan ári damýy men sapaly bilim berý, adam quqyqtaryn qorǵaý, ulttyq birlikti nyǵaıtý úshin mańyzdy. Ol úshin árbir qazaqstandyq Joldaýda qoıylǵan mindetterdi iske asyrýǵa jaýapkershilikpen qaraýy tıis. Abaı ýnıversıtetiniń ujymy óz jaýapkershiligin sezine otyryp, osy baǵytta júıeli jumystar júrgizýdi josparlap otyr», dedi ýnıversıtet rektory.
Igor Rogov elimizdiń Konstıtýsııasynda Qazaqstannyń ózin demokratııalyq, quqyqtyq, zaıyrly, áleýmettik memleket retinde tanytatyny aıqyn kórsetilgenin, onyń eń joǵary qundylyqtary adam, onyń ómiri, quqyqtary men bostandyqtary ekenin atap ótti. «Táýelsizdiktiń 30 jylynda respýblıkada kóp jumys atqaryldy. Meniń oıymsha, Q.Toqaevtyń júrgizip otyrǵan saıasaty bizdiń Tuńǵysh Prezıdentimiz belgilegen damý vektorynyń jalǵasy bolyp tabylady», dedi ol.
Baqytjan Ábdiraıym azamattardyń quqyqtaryn qorǵaý máselelerimen aınalysatyn AHQO, eki quqyqtyq ınstıtýttyń qyzmeti týraly jáne qazirgi tańda adam quqyǵy qyzmetiniń qandaı aspektileri mańyzdy bolyp tabylatyny týraly egjeı-tegjeıli áńgimeledi. Bolashaq zańgerler men stýdentterge bar múmkindikterdi paıdalanyp, tek ulttyq zańnamany ǵana emes, basqa da elderdiń zańnamalaryn zerdeleýge keńes berdi.
Memleket basshysy óz Joldaýynda atap ótkendeı, barlyq aıtylǵan bastamalar men strategııalyq mindetterdi iske asyrý úshin memlekettik apparat pen qoǵam tarapynan ortaq kúsh-jiger qajet. Bul rette barlyq deńgeılerde, onyń ishinde jastardyń - volonterler men stýdentterdiń belsendi qatysýymen qoǵamdyq dıalog damıtyn bolady.
О́z kezeginde Aınur Sábıtova azamattyq qoǵamnyń belsendiligin arttyrýǵa yqpal etetin, onyń basym bóligin - jastardy volonterlikke tartatyn «Akselerator dobra: Izgilik elshisi» jobasynyń qyzmeti týraly aıtyp, volonterlerdiń halyqqa kómek kórsetýdegi rólin atap ótti.
Is-sharaǵa qatysýshylar pikirsaıys formatynda Memleket basshysynyń Joldaýyn egjeı-tegjeıli talqylap, onda Qazaqstannyń odan ári damýynyń, ekonomıkalyq órkendeýi men el halqynyń ómirin jaqsartýdyń eń ózekti máseleleri kóterilgenin tilge tıek etti.
