Kórshilerdiń dabylymen órt sóndirýge № 13 órt sóndirý bólimi garnızonynyń órt sóndirýshi qaraýyly birneshe mınýttan keıin jetkenimen, órtti birden quryqtaýǵa shamalary kelmedi. О́rttiń oshaǵy gazben jylytylatyn monsha eken, endi jalyn jaqyn ornalasqan úı men sharýashylyq qurylystaryna «aýyz sala» bastaǵan. Jalyn turǵyn úıdi sharpysa bir úıli jan dalada qalmaq. Biraq jankeshtilikpen áreket jasaǵan órt sóndirýshiler ottyń odan ári taralýyna jol bermedi. Tilsiz jaýmen jantalasa arpalysqan olar birer saǵattyń ishinde otty tolyq aýyzdyqtap, úı ıeleriniń alǵysyn aldy.
Keıin úı ıesi A.Nurǵalıev órt sóndirýshilerge ǵana emes oblystyq TJ departamentiniń bastyǵy, polkovnık Ramıl Kamalovtyń atyna da hat joldap, rızashylyǵyn bildiripti. Onda órtke qarsy qyzmet qyzmetkerlerine osy órtti joıý kezinde kórsetken kásibıligi men jedeldigi úshin úlken alǵysyn bildiripti. «Sizdiń qyzmetkerlerińiz eren erlik kórsetip, tilsiz jaýǵa tótep berip, jarty saǵat ishinde otty sóndirip, óz isterine sheber ekendikterin kórsetti. Osy aýysymda jumys istegen azamattarǵa: qaraýyl bastyǵy, azamattyq qorǵaý aǵa leıtenanty Nurjan Jasulan men serjanttar Aıbek Aıdabosynovqa, Ernar Sháripovke, Erbol Esjanovqa jáne órt sóndirý avtokóliginiń júrgizýshisi Jambyl Jamalıevke óte rızamyn. Olar órtti sóndirip qana qoımaı, zardap shekken bizdiń otbasymyzǵa janashyrlyq kórsetti», delingen hatta.
«О́rt sóndirýshiniń jumysy qıyn ári qaýipti, órt sóndirýshiler materıaldyq jáne mádenı qundylyqtardy qorǵap, adamdardyń ómirin qutqaryp, azamattardyń beıbit tynyshtyǵyn qamtamasyz ete otyryp, ózderiniń densaýlyǵy men ómirine qaýip tóndiredi. Al kez kelgen ýaqytta alǵan alǵys sózder osy batyl mamandyqtyń ár ókiline óte qymbat», deıdi Soltústik Qazaqstan oblystyq TJD qoǵammen baılanys tobynyń bas mamany Evgenıı Jýravlev.
Árbir qyzmetkerdiń óz isine jaýapkershilikpen qarap, halyqtan alǵys alǵanyna ne jetsin.
Soltústik Qazaqstan oblysy,
Qyzyljar aýdany
