«Ulttyq kınony qoldaý memlekettik ortalyǵy» KeAQ tapsyrysy boıynsha rejısser Farhat Sharıpov túsirip jatqan trılogııanyń ekinshi bólimi – «Hardkor» fılmi búgingi jasóspirimderdiń ómirinen syr shertedi. Jańa fılmde rejısser búgingi kúngi nashaqorlyq derti taqyrybyn da qozǵamaq.
– 2019 jyly UKQMO uıymdastyrǵan ssenarııler baıqaýynda osy jobany usyndyq, keıin qarjylaı qoldaýǵa ıe boldyq. Bul týyndy «18 kılogers» fılminiń konseptýaldy jalǵasy. Kartınadaǵy basty keıipkerler – jasóspirim qyzdar, – dedi rejısser jáne ssenarıı avtory Farhat Sharıpov.
Basty rólde oınaıtyn aktrısany tabý ońaıǵa soqpady. Birneshe aıǵa sozylǵan kastıng barysynda kóptegen úmitkerdiń ishinen basty rólge Halyqaralyq bıznes jáne kommýnıkasııa kolledjiniń ekinshi kýrs stýdenti Vıktorııa Romanova bekitilgen bolatyn.
– Kınoǵa alǵash ret túsip jatyrmyn. Bala kezimde men de basqalar sııaqty aktrısa bolǵym keldi, biraq ta eshqaıda barmadym. Kastıng týraly qurbymnan estidim. Onymen birge kelip, sýretke tústim. Birneshe apta ótken soń maǵan habarlasyp, basty rólge bekitilgenim týraly aıtty. Shynymdy aıtsam, birden senbedim. Ony estigen meniń ájem qatty qýandy. О́ıtkeni rejısser Farhat Sharıpovtiń shyǵarmashylyǵymen jaqsy tanys eken, tipti onyń barlyq fılmin biledi. «Qyzǵylt qoıan týraly hıkaıa» – ájemniń eń jaqsy kóretin fılmi, – dedi jas aktrısa.
Aıta ketsek, fılmniń túsirý jumystary byltyr kúz aıynda bastalǵan bolatyn. Kartınanyń prodıýseri Dına Jumabektiń aıtýyna qaraǵanda, elimizdegi epıdemııalyq jaǵdaıǵa baılanysty túsirilimder birneshe ret basqa kúnge aýystyrylǵan eken.
Alaıda pandemııaǵa baılanysty oryn alǵan qıyndyqqa qaramastan, kásibı mamandardan turatyn fılmniń túsirý tobynyń quramy ózgergen joq. Fılmniń qoıýshy operatory – Aleksandr Plotnıkov. Ol Farhat Sharıpovtiń kóptegen fılminde birge jumys istegen. Sondaı-aq fılmniń qoıýshy sýretshisi Alekseı Shındın de kóp ýaqyttan beri rejıssermen birge jumys istep keledi. Búgingi túsirilimge Shındın bastaǵan sýretshiler toby gúldep turǵan alma aǵashyn arnaıy daıyndady.
Prodıýserdiń aıtýyna qaraǵanda, fılmniń túsirý jumystary jaqyn kúnderi aıaqtalyp, post-prodakshn jumystary (montaj, dybys jazý jáne túsirgen materıaldy óńdeý) bastalady.
Fılmniń prokaty týraly áli eshqandaı aqparat joq. Kınotýyndynyń prodıýseri halyqaralyq dıstrıbıýtorlarmen kelissózder júrgizip jatqanyn habarlady.
«Egemen-aqparat»
