«Sanaqtan bas tartqandarǵa jaýapkershilik qarastyrylǵan. Sanaq kezinde ár adam respondent bolyp esepteledi. Aqparat bermegeni úshin nemese belgisiz málimet bergeni úshin jaýpkershilik qarastyrylǵan. Biraq biz ony qoldanbaımyz, halyqqa sanaqtan ótýdiń paıdasyn túsindirip jatyrmyz», deıdi ol.
Onyń aıtýynsha, Almatyda sanaýdyń negizgi kezeńine 2 416 ıntervıýer, 345 nusqaýshy-kontroller jáne 37 komıssar tartylǵan. Sonymen qatar 146 erikti sanaq pýnktterindegi onlaın-sanaqqa jumyldyrylǵan.
«Biz sanaqqa qatysýǵa jumyssyz azamattardy, zeınetkerler men stýdentterdi tarttyq. Sanaq júrgizýshiler bir aıǵa tartylady. Barlyǵy 104 myń teńge kóleminde jalaqy alady», dedi departament basshysy.
Sanaq bastalǵan 15 kún ishinde 2 886 150 respondent onlaın-sanaqtan ótken. Sanaq.gov.kz saıtynda 2 487 415 adam suraqqa jaýap berse, 284 659 adam Egov portaly arqyly jaýap beripti, taǵy 114 076 respondent Aitu qosymshasynyń kómegimen sanaqtan ótken.
«Sanaq naýqanynyń qorytyndysy boıynsha shartty túrde Áýezov aýdany birinshi orynda, Alataý aýdany ekinshi orynda jáne Naýryzbaı aýdany úzdik úshtikti jabady. Bostandyq, Túrksib, Almaly aýdandaryndaǵy sanaqqa qatysýshylarynyń sany shamamen teń. Medeý men Jetisý aýdandarynyń turǵyndarynyń belsendiligi sál tómen», deıdi Ábildabekov.
15 qazanǵa deıin halyq sanaǵyna onlaın rejıminde qatysýǵa bolady. Oflaın kezeń 1-30 qazan aralyǵynda ótedi.
