О́rt qaýipsizdigi aıynyń sheńberinde Departament qyzmetkerleri jergilikti atqarýshy organdarmen, jergilikti polısııa qyzmetimen jáne volonterlermen birlesip turǵylyqty jeri boıynsha profılaktıkalyq reıdter júrgizedi, olar halyqty peshpen jylytý, elektrmen jylytý aspaptaryn paıdalaný kezindegi órt qaýipsizdigi sharalaryna jáne órt týyndaǵan jaǵdaıdaǵy is-qımyldarǵa oqytýǵa baǵyttalǵan. Búgingi tańda oblys boıynsha 42 myńnan astam azamat qamtylyp, 14 566 turǵyn úıde profılaktıkalyq jumystar júrgizildi.
Departament jylý berý kezeńi bastalǵanǵa deıin jylytý peshterine jóndeý júrgizýdi usynady, qoldanystaǵy qaǵıdalarǵa sáıkes tútin murjasyn tazalaýdy keminde 3 aıda bir ret júrgizý qajet.
Jylytý peshteriniń janynda jıhaz jáne basqa da janǵysh zattardy ornalastyrýǵa tyıym salynady, sondaı-aq pesh jaǵý úshin tez tutanatyn jáne janǵysh suıyqtyqtardy paıdalanýǵa tyıym salynady.
Budan basqa, qoldan jasalǵan elektr qyzdyrǵysh aspaptaryn paıdalanýǵa tyıym salynady, bir jelige birneshe elektr aspaptarynyń qosylýyna jol berilmeıdi, bul elektr jelisiniń shamadan tys júktelýine ákep soǵady, elektr symdarynyń, qosqyshtardyń jáne rozetkalardyń aqaýsyzdyǵyn qadaǵalaý qajet.
Eń bastysy, balalarǵa turmystyq quraldardy óz erkimen paıdalanýǵa ruqsat etpeý, sirińkelerdi olar úshin qol jetpeıtin jerlerge qoıý jáne kishkentaı balalardy eresekterdiń qaraýynsyz úıde jalǵyz qaldyrmaý qajet.
Aıta ketý kerek, azamattyq qorǵaý organdary bilim basqarmalary men bólimderimen birlesip oqý mekemelerinde órt qaýipsizdigi erejelerin oqytý boıynsha jumystar júrgizýde.
2021-2022 jj. oqý kezeńinde bilim berý uıymdarynda 2 myńnan astam adamdy qamtı otyryp 23 ınteraktıvti sabaq, 792 adam qamtı otyryp 113 dáris, áńgime jáne nusqamalar ótkizildi.
«Egemen-aqparat»
