Ortalyq Azııa jańalyqtar qyzmetiniń jazýynsha, jıyn jabyq esik jaǵdaıynda ótken. Oǵan Qazaqstan, Tájikstan, Qyrǵyzstan prezıdentteri men Armenııa premer-mınıstri jáne Reseıdiń syrtqy ister mınıstri qatysty. Reseı basshysy Vladımır Pýtın onlaın-formatta qatysyp otyrdy.
Jıyn kezinde Qyrǵyz prezıdenti Sadyr Japarov táliptermen Aýǵanstandaǵy jaǵdaıdy tezirek qalypqa keltirý jáne yntymaqtastyq máselesinde dıalogqa kelý kerek ekenin aıtqan.
Tájikstan basshysy Emomalı Rahmon bolsa, «Talıban» qozǵalysy óziniń bergen ýádesin oryndamaǵanyn aıtyp, synǵa alǵan.
«Tálipter ózge de etnıkalyq toptardyń qatysýymen ınklıýzıvti úkimet quramyz degen ýádesin oryndamady. Onyń ústine ortaǵasyrlyq sharıǵat zańyna súıenip, ıslam Emıratyn quramyz dep málimdedi», degen tájik prezıdenti.
Tájikstan prezıdenti sonymen birge Aýǵanstannan kúndelikti kelip jatqan aqparatqa sáıkes, «jaǵdaı biz oılaǵannan da kúrdeli ekenin kórsetip otyr» degen. Ol tálipterdi Pandjsher qalasyn tutastaı qorshap, azyq-túlik jibermeı otyr dep aıyptady.
Ázirge Reseıdiń Aýǵanstandaǵy jaǵdaıǵa baılanysty ustanymy aıqyn bolmady. Vladımır Pýtın áriptesterine kez kelgen jaǵdaıǵa daıyn bolýǵa shaqyrǵan.
17 qyrkúıekte Dýshanbede Shanhaı yntymaqtastyq uıymyna múshe elderdiń lıderleriniń basqosýy ótedi.
