Qudaıy qonaqty qala qaqpasynan qarsy alǵan eriktiler qazaqy qalypqa saı shashý shashyp, shapan kıgizdi, Almatynyń tátti almasyn usyndy. Qazaq elin Táýelsizdiktiń mereıli belesimen quttyqtaı keldim degen meıman óz áserimen bólisip, joldaǵy kórgen-bilgenin ortaǵa saldy.
«Tórt aı boıy 15 eldi kesip óttim. Kúndiz tynymsyz jol júrip, tún mezgilinde shatyr tigip, tabıǵat aıasynda tynyqtym. Jolda túrli qyzyqtarǵa kez bolasyń. Úreıli oılar sanańdy sharpıdy. О́ıtkeni aldyńnan san qater shyǵady. Dese de Almatynyń ásem tabıǵaty sonyń bárin umyttyryp jiberdi. Sharshap-shaldyǵyp kelgende aldyńnan mynadaı keremet shyǵa kelse jol azaby sóz be? Mynadaı asqaq taýlardyń baýraıyna kelgende, munda ómir súretin adamdar shynymen baqytty degen oıǵa keldim», deıdi saıahatshy.
Jıhankez elimizde 10 kún aıaldaıtynyn, Medeý men Shymbulaqqa, Qaıyńdy kóli men Kólsaıǵa, Sharyn shatqalyna baratynyn aıtty. Sonymen birge sapar sońynda el astanasyn kórýdi de josparlap otyrǵanyn jetkizdi.
«Negizgi mamandyǵym ekonomıst. Velosıpedpen álem kezý meniń bala kúngi armanym. Uly-Jibek jolynyń tarıhyn jastaıymnan oqyp óskendikten de Qazaqstanǵa kelýdi kópten maqsat tutyp júrdim. Jáne ózim tarıhyna erekshe qyzyǵatyn elge erekshe kólikpen, eńbekpen kelgenime qýanamyn. Renn qalasynyń meri Natalı Appereniń hatyn ala keldim. 7 jarym myń shaqyrym jol júrip kelgen hatta Renn-Qazaqstan arasyndaǵy dostyq qarym-qatynasqa bıyl 30 jyl tolǵany baıandalady», deıdi Loran.
Jeti jarym myń shaqyrymdy shaıtanarbamen eńsergen eriktiniń erik jigerine tańǵalmaı kórińiz. Qaıtar joldyń qamy qalaı degen saýalymyzǵa: «aldymyzda sýyq mezgil kele jatqandyqtan, Fransııaǵa aspan jolymen attanýǵa týra keledi» dep jaýap berdi jıhankez.
