– Qaýipti vırýsty juqtyrǵan naýqastardyń 93 paıyzy saýyǵyp shyqty. О́ńirde koronavırýs ınfeksııasynyń taralýy sońǵy bir aıda 5,6 esege tómendedi. Osyǵan baılanysty 624 oryndyq ınfeksııalyq stasıonar ázirlendi. Stasıonarlardyń jansaqtaý bóliminde 40 tósektik oryn bar. Qazir ınfeksııalyq stasıonarda 518 naýqas oqshaýlanyp, tósektik oryn júktemesi 22 paıyzdy qurap otyr, – dedi B.Hamenova.
Koronavırýs ınfeksııasynyń birinshi tolqyny sanalǵan byltyrǵy jazda dári-dármek tapshylyǵy baıqalǵan edi. Muny joqqa shyǵarmaǵan oblys ákimi orynbasarynyń aıtýynsha, turǵyndardyń jany qysylyp, dári izdegen sabylysynan soń dári-dármektiń turaqty qoryn jasaqtaý, dárihanalardaǵy baǵanyń turaqtylyǵyn saqtaý maqsatynda «Atyraý» áleýmettik-kásipkerlik korporasııasy» AQ men «Ińkár» JShS arasynda kelisim jasalyp, 500 mln teńge bólingen. Bul qarjyǵa 42 túrli dári-dármek satyp ákelingen. Buǵan qosa, demeýshilik kómekpen 3 mlrd-tan astam teńgege jeke qorǵanysh quraldary men medısınalyq tehnıka satyp alynǵan.
– Qazir óńirde 14 PTR-test zerthanasy jumys istep tur. Onda táýligine 16 myńnan astam test júrgizý múmkindigi bar. Medısınalyq mekemelerde jeke qorǵanysh quraldary men dári-dármektiń eki aılyq qory jasaqtaldy. Jedel medısınalyq kómek kórsetý qyzmetin jetildirý baǵytynda jańadan 66 kólik alynyp, 5 jyljymaly medısınalyq keshen iske qosyldy. Atyraý men Qulsary qalasynda 200 oryndyq modýldik aýrýhana paıdalanýǵa berildi, – dedi oblys ákiminiń orynbasary.
Karantındik shekteý sharalary ásirese, shaǵyn jáne orta bıznestiń ókilderine ońaı bolmaı tur. Keıbir kásipkerler shyǵynǵa batqanyn aıtady. Soǵan baılanysty Ashyq júıesi engizilgen edi. Máselen, Atyraýda 13 qyrkúıekke deıin atalǵan júıege 8 409 kásipkerlik nysany qosylypty. Degenmen qyrkúıek bastalǵaly 4 848 nysan tekserilgen. Sol kezde 292 nysannyń eki apta boıy Ashyq júıesin qoldanbaǵany anyqtalǵan. Osyǵan baılanysty atalǵan nysandar eki aptalyq merzimge baǵdarlamadan shyǵaryldy.
Atyraý qalasy men 7 aýdanda qurylǵan 64 monıtorıngtik toptyń músheleri karantındik shekteý talabynyń saqtalýyn qadaǵalaıdy. Top quramynda ákimdik, densaýlyq saqtaý, polısııa men basqa da organdardyń ókilderi engizilgen. Jyl basynan beri mundaı toptar 51 713 nysanǵa 12 501 reıd júrgizipti. Reıd nátıjesinde 850 quqyq buzýshylyq anyqtaldy. Karantın talabyn buzǵan shaǵyn jáne orta bıznes nysandary men jeke tulǵalarǵa 83 618 515 teńge kóleminde 596 aıyppul salynǵan. Al qyrkúıek bastalǵaly júrgizilgen 366 reıd kezinde 1 696 nysannyń jumysy qadaǵalanǵan. Tekserý nátıjesinde 31 ákimshilik is qozǵalyp, salynǵan aıyppul kólemi 1 939 805 teńgeni qurap otyr.
Ákim orynbasarynyń aıtýynsha, sońǵy kezde vaksına saldyrýǵa ynta bildirýshiler qatary kóbeıgen. Vaksınalardyń birinshi komponentin saldyrǵandar sany 215 357 (86%) adamǵa jetse, ekinshi komponentti 166 570 turǵyn (76%) ektirgen. Bul – óńirde ekpe alýshylar qataryndaǵy turǵyndardyń 71,8 paıyzy. Qazir oblysta 59 vaksına beketi jumys istep tur. Onyń ishinde 10 jyljymaly beket bar. Bul beketterge aqpan aıynan beri vaksınalardyń birinshi komponentine arnalǵan 248 330, ekinshi komponent úshin 216 790 doza jetkizilipti.
– Oblystyń shalǵaı aýyldaryn meken etken turǵyndardyń vaksına saldyrýyn qamtamasyz etý maqsatynda «Qazaqstan temirjoly» AQ-men birlesken jobany qolǵa alǵan edik. Qazir alystaǵy eldi mekenderdiń turǵyndary vaksınalaý beketine poıyzben tegin jetkiziledi. Jurtshylyqty vaksına saldyrýǵa yntalandyrý úshin oblystyq ákimdiktiń qoldaýymen «Azamattyq Alıans» ZTB 30 maýsymnan beri aqshalaı utys aksııasyn bastady. Oǵan vaksına alǵandar ǵana qatysýda. Aqshalaı utys oıynynyń jalpy júlde qory 40 mln teńgeni quraıdy. Bas júlde – 10 mln teńge. Osy kezge deıin vaksına ektirgender arasynda 200 myń teńgeniń 60 sertıfıkaty, 1 mln teńgeniń 6, sondaı-aq 3 mln teńge turatyn 2 sertıfıkat oınatyldy, – deıdi B.Hamenova.
Jahan jurtyn janalqymnan alǵan qaýipti vırýsqa qarsy osyndaı is-sharalar atqarylyp jatqan Atyraýda 1 447 dáriger men 5 093 orta býyndy medısına qyzmetkeri jumys isteıdi. Alaıda densaýlyq saqtaý salasyna áli de 219 dáriger jetispeıdi. Ásirese, jalpy tájirıbelik dáriger, anestızıolog-reanımatolog, akýsher-gınekolog sekildi mamandar qajet-aq. Al bıyl joǵary oqý ornyn bitirgen 34 jas maman kelgen. Onyń ishinde 26 ıntern, 5 rezıdent, 3 bakalavr bar.
