Prezıdenttiń kezekti Joldaýyn qashanda qalyń kópshilik, onyń ishinde kásipodaq músheleri de asyǵa kútedi. Prezıdent elimizdiń áleýmettik damýy, turǵyndarynyń tabysy, jumys oryndarynyń saqtalýy, halyqtyń densaýlyǵy men ómirin saqtaý jolyndaǵy jumystar jóninde egjeı-tegjeıli toqtalyp, basty máselelerge nazar aýdardy. Joldaý elimizdiń bolashaq damýymen erteńgi kúnge betburysyn aıqyndap berdi. El damýy men halqymyzdyń ómirinde birshama jańalyqtyń bolatynyn kórsetti. Ásirese, Joldaýda ekonomıkamen qatar, mádenı, rýhanı dúnıeni de qatar kóterý qajettigin atap ótildi.
Búginde barlyq dúnıe, azyq-túlikten bastap, tutyný zattaryna deıin edáýir ese qymbattap ketti. Bul halyqtyń janyna qatty batýda. Qazir kúnkórisi tómen sanattaǵylar ǵana emes, kásippen shuǵyldanyp otyrǵandar da qınalyp otyr. Bul máseleni de eńserýde Joldaýda naqty tapsyrmalar berildi.
Joldaýdyń oryndalýy bizge ne beredi degen suraqqa jaýap izdesek, ol Prezıdenttiń 5 bastamasynda aıqyn kórinip tur. Olar, tómengi jalaqynyń kóterilýi, salalyq eńbekaqylardyń ósýi (bul 600 myńnan asatyn adamdy qamtıdy). Sondaı-aq turǵyn úı alý men aýyl sharýashylyǵyn damytý, sýbsıdııa berý máseleleri anyq kórsetildi.
Joldaýda balalarymyzdy mamandyq tańdaýǵa, ǵylymdy, pedagogıka men medısınany, energetıka men aýyl sharýashylyǵyn, IT-tehnologııalaryn bilýge, oqýǵa baǵyttaý kerektigi aıtyldy. Keleshegiń kemel bolý úshin bilim alý aýadaı qajet bolsa, elimizge jańashyl jas mamandar da sondaı qajet.
Berik KО́PBAIULY,
«Qazaqstandyq salalyq mádenıet, sport, týrızm jáne aqparat qyzmetkerleriniń kásiptik odaǵy» QB
Nur-Sultan qalalyq fılıalynyń qyzmetkeri
