Oblys ákiminiń orynbasary óńirde indet juqtyrǵan 17 247 adam tirkelse, onyń 91 paıyzy aıyǵyp shyqqanyn atap ótti. Byltyr bastalǵan indettiń bıyl órshı túskeni baıqalyp otyr. Mysaly, ótken jyly koronavırýs ınfeksııasyn 3 392 turǵyn juqtyrsa, bıyl jyl basynan tirkelgen naýqastar sany 13 855-ke jetken. Ásirese, shilde, tamyz aılarynda boıynan indet belgisi baıqalǵandar qatary artty. Pnevmonııamen aýyrǵan 2 266 naýqastyń 2 048-i aıyǵyp shyqqan. О́tken 2 aıda ókpesi qysylǵandar da kúrt kóbeıipti.
– Oblysta qazir 1 160 ınfeksııalyq tósektik oryndaǵy júkteme 30 paıyz bolyp otyr. Aıtqan jerden aýlaq, degenmen epıdemııalyq ahýal ýshyǵa qalǵan jaǵdaıda ınfeksııalyq jáne provızorlyq stasıonarlarda oryn sanyn 3 200-ge deıin ulǵaıtýǵa múmkindik bar. Bıyl qurylysy byltyr bastalǵan modýldik stasıonar iske qosylyp, naýqastarǵa jaǵdaı jasaý, olardyń saýlyǵyn baqylaý jaqsara tústi, – dedi oblys ákiminiń orynbasary.
Baljan Móráliqyzy indetti boldyrmaý sharalary aıasynda dári-dármek qoryn qalyptastyrýǵa basa mán berilip otyrǵanyna da toqtaldy. Dál qazir óńirde 2 aılyq qor bar. Bul úshin jergilikti bıýdjetten 488 mln teńge bólingen. Basqa da qajetti qural-jabdyqtar tapshylyǵy baıqalyp turǵan joq. Maman kadrlar da jetkilikti.
Oblysta ujymdyq ımmýnıtetti qalyptastyrý maqsatynda ekpe alýǵa qabiletti 401 myń turǵynnyń 291 237-si ekpeniń 1 komponentin aldy. Ekpeniń ekinshi bóligin salý da kestege sáıkes júrgizilýde. О́ńirde 106 egý kabıneti turaqty jumys istep tur. 167 monıtorıngtik top aı basynan beri 524 nysanǵa tekseris júrgizip, karantın talaptaryn buzýdyń 65 deregi anyqtaldy.
Brıfıngte naýqastarǵa medısınalyq qyzmet kórsetý, jalǵan vaksına pasportyn jasatý, indet saldarynan kóz jumǵandar sany týraly saýaldar qoıyldy. Oblys ákimi orynbasarynyń aıtýynsha, jyl basynan beri 451 adam koronavırýs pen pnevmonııadan qaıtys bolǵan.
– Burynnan qant dıabeti men gıpertonııaǵa shaldyqqan jasy úlken kisilerge bul dert ońaı tıip otyrǵan joq. Osyǵan baılanysty qazir jasy ulǵaıǵan turǵyndar arasynda vaksınanyń paıdasy jaıly úgit-nasıhat jumystary júrgizilip jatyr, – dedi aımaq basshysynyń orynbasary.
Baljan Shámenova jalǵan vaksına pasportyn berýi múmkin degen eki emhanada tekserý jumystary júrgizilip jatqanyn da aıtyp ótti.
Qyzylorda oblysy
