DSU málimetteri boıynsha, bıyl vırýstyń úsh shtamy: A (H1N1), A (H3N2) jáne B ózekti bolmaq.
Eldegi epıdahýal áli de kúrdeli, kúzgi kezeńde aǵzany ózge de respıratorlyq ınfeksııalardan qorǵaý qajet.
Aıta ketsek, Úkimet shtamdyq boljamdy eskere otyryp, azamattardy maýsymdyq vırýstardan qorǵaý úshin aldyn-ala tumaýǵa qarsy vaksınalarmen qamtamasyz etýde. Tumaýǵa qarsy vaksınasııa 15 qyrkúıekte bastaldy.
Memleket Reseıde óndirilgen «GRIPPOL+» preparatynyń 2,5 mıllıon dozasyn satyp aldy. Tegin vaksınasııa aıasynda halyqtyń eń osal toptary - medısına qyzmetkerleri, balalar, dıspanserlik esepte turǵan pasıentter, balalar úıleriniń, ınternattardyń, sábıler úıleriniń tárbıelenýshileri jáne epıdemıologııalyq kórsetkishter boıynsha vaksınasııalaýǵa jatatyn azamattar osy preparatpen egiledi.
«GRIPPOL+» preparatynan basqa elimizde tumaýǵa qarsy kelesi vaksınalar tirkeldi: Sanofı-Paster (Fransııa) óndirgen «Vaksıgrıp Tetra», Inflıývak (Nıderlandy), Sınovak Bıotek (Qytaı) óndirgen tumaýǵa qarsy vaksına.
Immýndaý tek aqysyz negizde ǵana emes, jumys berýshilerdiń, sondaı-aq halyqtyń qarajaty esebinen de aqyly túrde júrgiziletin bolady. Tumaýǵa qarsy aqyly vaksınasııa jeke medısınalyq ortalyqtarda, turǵylyqty jeri boıynsha ýákiletti organnyń ruqsaty bar emhanalardyń egý kabınetterinde júrgiziledi.
