14 oblystyń chempıondary «Astana Arenada» úzdik aýyl komandasyn anyqtaıdy. Qatysýshylardyń jas ereksheligi 8-9 jáne 10-11 jas bolyp eki sanatqa bólinedi. Úzdik shyqqandar marapattalyp, elordaǵa saıahattaıdy. Sondaı-aq olar ulttyq quramanynyń oıynyn stadıonnan tamashalap, keıin fotosessııa jasaıdy. Osylaısha, 28 komandanyń 350-ge jýyq jas jetkinshegi fýtbolǵa qadam basady.
«Olardyń ishinde úzdik shyqqan balalardy Qazaqstan quramasynyń bas bapkeri Talǵat Baısýfınov pen Jastar quramasynyń bapkeri Qaırat Nurdáýletov anyqtaıdy. Ár komandadan kózge túsken aýyl balalaryn oblys ortalyqtaryndaǵy fýtbol mektepterine aldyrtamyz. Shalǵaıda jatqan aýyl balalarynyń fýtbolshy bolýǵa bir múmkindigi ashylady», dep jazdy sport jýrnalısi Ermuhamed Máýlen.
Atalǵan joba 2022 jyly sáýir aıyna qaraı bastalady. Bir komanda sapynda 1 qaqpashy, 5 oıynshy bolady. Jarysqa birneshe aýyl birigip, qurama komanda jasap shyǵarsa da bolady. Biraq, 14 fýtbolshydan turatyn ótinishti jarys aıaqtalǵansha saqtaýy tıis.
